哈利馬古尼由於私人原因，將較遲同球隊會合。
曼聯宣布出戰「美國之旅」32人大軍名單，4位被掛牌出售嘅球員阿歷真度加拿祖、查頓辛祖、安東尼馬菲奧斯、杜維爾馬拉西亞都冇份，恐怕紅魔鬼生涯已到盡頭。最令人意外係防線主力哈利馬古尼榜上無名，一度惹離隊驚魂，幸好佢只係由於私人原因較遲同球隊會合，球迷可以鬆一口氣。
早前已有消息指曼聯會方將拉舒福特、阿歷真度加拿祖、查頓辛祖、安東尼馬菲奧斯、杜維爾馬拉西亞「隔離」，唔需要參加季前操練，並可自行同其他球會傾加盟事宜。其中拉舒福特將以先借後買方式轉投巴塞隆拿，其餘4人前途仍未明朗，但肯定已唔屬於紅魔鬼領隊魯賓艾摩廉計劃之內，因為呢位葡萄牙少帥寧願帶埋正在養傷嘅門將奧拿拿、中堅利辛度馬天尼斯去美國，都唔要上述4子。
呢4位棄將去向各有傳聞，阿歷真度加拿祖最搶手，獲得拿玻里、馬德里體育會、阿士東維拉等多間球會青，曼聯要求4,000萬鎊轉會費，令各潛在買家有所卻步。
至於安東尼馬菲奧斯希望正式轉投貝迪斯，佢1月底被外借去呢支西甲球隊上陣26場入9球。另外，有傳祖雲達斯有意簽查頓辛祖，杜維爾馬拉西亞可能返回荷甲搵食。
另外，名單上缺少哈利馬古尼令人大感意外，一度傳出佢受傷，亦有人擔憂呢位32歲英格蘭國腳可能離隊，皆因佢只剩下1年合約。其後馬古尼透過社交網澄清，話感謝大家關心，一切安好，將稍遲自行飛去美國同球隊會合。
曼聯將喺美國踢3場熱身賽，對手包括韋斯咸、般尼茅夫、愛華頓，跟住返回主場對費倫天拿，剛加盟嘅麥比奧莫將於美國上演成「魔」處子戰，佢同另1位鋒線新兵馬菲奧斯根夏合作令人期待。
本文作轉載及備份之用 來源 source: http://hk.on.cc
|
鍾意就快D Share啦！
|
|
|