般奴費南迪斯今場射入2球。(Getty Images)
去片睇般奴費南迪斯射入靚波
曼聯喺周日(27日)早上「美國之旅」季前熱身賽首站，憑隊長般奴費南迪斯射入2球，以2比1擊敗韋斯咸，打開勝利之門。美中不足係日前由賓福特加盟嘅前鋒麥比奧莫並冇上陣，難免令紅魔鬼球迷感到失望。
曼聯上場熱身賽僅打和列斯聯0比0，今仗表現有明顯改善，新10號仔馬菲奧斯根夏繼續擔任正選。開賽唔夠1分鐘，紅魔鬼就有黃金機會，海倫半單刀勁射，可惜中柱彈出。
僅過3分鐘，般奴費南迪斯開出罰球，韋斯咸門將艾路拿接波甩手，情急之下撲跌艾登希雲，球證判罰12碼，般奴費南迪斯主射入網打開紀錄。
曼聯攻勢一浪接一浪，海倫又有1次勁射高出，般奴費南迪斯遠射，僅貼楣出界，阿密特迪亞路曾經射門入網，但因為越位被判無效，曼聯上半場領先1比0。
換邊之後，曼聯繼續搶攻，般奴費南迪斯單刀起腳，被艾路拿擋出，但呢位32歲法國門將跟住卻犯錯，作出誤傳，曼聯中場明奈截到後，立即打反攻，傳畀般奴費南迪斯射入靚波領先2球。戰至63分鐘，韋斯咸憑查洛保雲入波追番1球，曼聯主帥魯賓艾摩廉隨即一次過換10位球員試陣，但日前新加盟前鋒麥比奧莫並冇上陣。
韋斯咸亦大量換人，尤其是盧卡斯柏基達上陣後，創造唔少攻勢，臨完場前，查洛保雲勁射，被門將比恩迪亞撲出，最終曼聯維持2比1勝果，將於周四(31日)早上「美國之旅」第2站對般尼茅夫。
本文作轉載及備份之用 來源 source: http://hk.on.cc
|
鍾意就快D Share啦！
|
|
|