憑經典韓劇《金秘書為何那樣》紅遍全亞洲嘅朴敏英，轉眼就快「奔四」。佢日前出席時尚活動，被發現瘦咗唔止一個碼，纖腰一握即斷咁款，俏臉仲削到猶如骷髏頭！搞到粉絲高呼心痛，叫女神食番多啲嘢喎。
事後朴敏英喺自己IG發相，濾鏡極重，雖然冇開Live瘦到咁得人驚，但無可否認，真係無復當年勇。即係咁，女神仍然皮光肉滑，但硬係唔知點解，面頰凹陷，下巴都長埋，偏偏蘋果肌異常飽滿，搞到好似顴骨凸起咁。究竟係老咗、瘦咗定塌咗呀？
嗱，唔係本欄把口Mean呀，事實係朴敏英嘅驚人顏值並非天然，佢都直認曾經整容。敢做敢認固然令人肅然起敬，但人工美呢家嘢，必然會有「賞味期限」。女神都成39歲啦，骨膠原開始大面積流失，加上過度減肥，面無半両肉，眼耳口鼻Hold唔住，絕對不足為奇。
佢3年前主演《月水金火木土》，已被指容顏崩壞，口痕友甚至話佢似巫婆添！舊年推出《和我老公結婚吧》，為角色激減至體重不足40公斤，更加弱不禁風，但因為劇集叫好叫座，外間對佢容貌批評減少。點知日前出席活動，又瘦出新高度，不得不嘆句：金秘書一去不復返！
講開又講，女神情史豐富，除咗咸豐年前承認跟李敏鎬拍過拖，之後亦頻頻傳出撻着劇中拍檔，堪稱男神收割機。不過女神一直冇再承認戀情，直到2022年被踢爆跟富商有一手，先至直認不諱，點知男方原來係老千，牽涉多宗詐騙醜聞，女神喺認愛翌日即火速割席，都咪話唔尷尬，難怪到家陣都唔敢再輕易談情說愛。
本文作轉載及備份之用 來源 source: http://hk.on.cc
|
鍾意就快D Share啦！
|
|
|