麥比奧莫射失決定性12碼。(Getty Images)
低處未算低！英超豪門曼聯周四(28日)凌晨經歷大災難，佢哋喺英聯盃第2圈作客英乙球隊甘士比，先輸2球下艱苦追平，最終喺「馬拉松式」互射12碼輸11比12，恥辱性被踢出局。曼聯領隊魯賓艾摩廉喺12碼決勝期間，竟然坐喺後備席匿埋唔睇，疑似冇面見人，被球迷鬧爆。
英超開季2戰不勝，曼聯今場派貴價前鋒班捷文施斯高首度擔正，配合馬菲奧斯根夏、哈利馬古尼同復出嘅奧拿拿等球星，諗住喺「乙組仔」甘士比身上拎番信心，點知上半場嚇人一跳，被甘士比連入2球，奧拿拿先輸近柱波，再喺角球手錘打空氣，成為輸波一大罪人。
曼聯下半場再換入麥比奧莫、般奴費南迪斯等核心入場救亡，麥比奧莫75分鐘追番1粒，完場前1分鐘再靠哈利馬古尼頂成2比2。互射12碼階段，甘士比喺第3輪射失，但決定性第5輪曼聯亦有根夏宴客，未能獲勝後進入「突然死亡」，第13輪曼聯再有麥比奧莫射失，輸11比12出局。
災難式被英乙隊淘汰，艾摩廉自然成為眾矢之的，佢喺12碼期間被影到匿埋喺後備席「冇眼睇」，呢個舉動被球迷猛烈炮轟：「同英乙隊射12碼都要匿埋唔睇，恥辱」、「叫艾摩廉滾蛋」、「12碼都唔敢睇，艾摩廉可以執包袱」、「冇膽匪類唔配教曼聯」......
艾摩廉賽後就為球隊表現公開道歉，同時批評球員醜陋演出：「今場所有事都出錯，呢個係曼聯問題，我哋應該踢得更好，我要向球迷道歉。呢班球員今日嘅表現，好清楚咁講出佢哋想點，今場結果好公平，踢得好嗰隊晉級。我係領隊，明白發生咩事係我工作，我再次向球迷道歉。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|