拉舒福特仍要時間融入巴塞。
西甲勁旅巴塞隆拿周一(11日)凌晨喺甘柏盃，主埸5比0大勝意甲球隊科木，不過新加盟嘅英格蘭前鋒拉舒福特，首次正選上陣就出洋相，佢喺完半場前面對空門竟然射唔中龍，未開咧已經炮製「世紀失機」。拉舒福特同另外7位球員目前仍未註冊，爭取西甲開鑼上陣要同時間競賽。
今場係巴塞喺新球季前最後熱身，由於羅拔利雲度夫斯基受傷，「福仔」得以首度擔正出任箭頭。巴塞表現勇猛，費明盧比斯早段連入2球，拉舒福特37分鐘亦助攻拉芬夏比洛尼入波，拉明耶馬42分鐘再下一城。福仔完半場前本來有機會入波，但佢接應耶馬傳送後，扭過門將射空門竟然柱邊出界，附近3位隊友同一時間抱頭表現得難以置信。
呢次「世紀失機」亦係拉舒福特今場最後表演，中場休息已被換走，巴塞下半場由拉明耶馬再入1球，取得5比0漂亮勝仗，西甲開咧前注入強心針。巴塞教練費歷克唔介意拉舒福特失機，大讚幾位新兵演出：「我對3個新球員嘅表現都好滿意，佢哋令球隊質素提升，而且好明白我哋嘅踢法。」
巴塞會喺周日(17日)凌晨西甲開鑼戰作客馬略卡，如果「羅拔仔」仍未傷愈，拉舒福特好大機會繼續出任正選前鋒，不過西班牙《阿斯報》報道，拉舒福特、祖安加西亞、施捷斯尼等8位新加盟、續約或外借回巢球員，目前仍未喺西甲註冊，但隨住球隊日前取消達史特根註冊後，預料註冊申請可以加速，有望趕及西甲開鑼前搞掂。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
