K-Pop天王G-Dragon一連3日嘅香港站演唱會圓滿落幕，意味亞洲之旅完結，9月將展開北美及歐洲場。講番香港站，發生唔少不愉快事件，包括大量黃牛騙案、內部飛跑票等。僥倖入到場嘅香港粉絲一樣谷住度氣，皆因見到唔少大陸粉絲「與別不同」嘅應援方法，火都嚟埋！
話說9號第二場，其中一個高潮環節，就係龍哥走落台同VIP粉絲互動。大家都萬分期待，點知龍哥去到某位企頭排嘅大陸女粉絲面前之際，女粉絲竟然將手中大疊「銀紙」兜口兜面掟向龍哥！連龍哥本人都愕咗一然。
嗱，嗰位大陸女粉絲仲沾沾自喜，將「第一身」視頻放上網，結果即時惹起轟動！唔係羨慕佢呀，而係鬧爆佢，將佢剷到上天花板！喂，無論係東西方文化，兜口兜面向表演者掟錢，都係極不尊重及無禮嘅行為，甚至會視為侮辱！再講吖，身為中國人理應知道，呢個舉動同「灑溪錢」冇乜分別，極之唔老利！另外，又有大陸粉絲特登舉起「帶勝利返嚟」嘅韓文燈牌，大佬呀，呢場係龍哥Solo，做乜要提個監躉前隊友呢？
雖然嗰啲銀紙只係假鈔，但究竟咁做有乜為，大家都「黑人問號」。即係咁，本來大陸粉絲應援真係好給力，既包攬全港港鐵站電子屏幕燈箱廣告，仲包咗「鴨靈號」帆船喺維港兜圈，再加埋機管局破天荒首次批准喺機場搞應援，呢啲舉動肯定令龍哥夠晒飛屎！聽聞呢啲使費，花咗成40萬港紙。
可惜吖，一粒老鼠屎攪壞一鍋粥，掟銀紙事件連外國龍粉都睇唔過眼，仲入埋香港數，香港人今次真係咩面都冇！
本文作轉載及備份之用 來源 source: http://hk.on.cc
|
鍾意就快D Share啦！
|
|
|
