歐聯抽籤話題性十足。(Getty Images)
周五(29日)凌晨歐聯抽籤，新賽制下激戰連場兼充滿話題，「愛回家」更成為球壇熱話。今夏叛逃利物浦而成為公敵嘅阿歷山大阿諾特，將隨皇家馬德里重返晏菲路鬥「紅軍」；曼城大帝奇雲迪布尼轉會拿玻里後，亦抽中要作客倒戈「藍月亮」，兩大球星回歸必受球迷熱烈「招呼」。
奪冠熱門利物浦今次籤運不過不失，對手包括馬德里雙雄同國際米蘭，當中主場對皇馬一戰，將係阿諾特離隊後首度重返晏菲路，呢位英格蘭國腳離隊嗰陣被利迷唾罵，有人更燒佢波衫，領隊施洛表示：「我肯定呢場會係全世界關注嘅比賽。」利物浦作客法蘭克福，亦會係新箭頭艾基迪基嘅倒戈戰。
另一「愛回家」主角奇雲迪布尼，今夏結束10年曼城生涯，轉投意甲拿玻里，估唔到立即就有機會倒戈曼城，曼城總監維亞拿抽籤後表示：「今次抽籤最好地方，就係我哋嘅傳奇回歸，我相信哥迪奧拿同球員、球迷都會好開心咁迎接佢，同奇雲迪布尼重逢令人興奮。」
歐聯聯賽階段抽籤有唔少巔峰對決，除利物浦對皇家馬德里外，仲有皇家馬德里對曼城、巴塞隆拿對巴黎聖日耳門、阿仙奴對拜仁慕尼黑等等，其中衞冕嘅巴黎聖日耳門抽中「地獄籤」，要鬥巴塞隆拿、拜仁慕尼黑、熱刺、紐卡素、阿特蘭大同利華古遜等勁旅，場場硬仗。
歐聯聯賽階段每隊踢8場(4主4客)，積分榜前8名直接晉級16強，第9至24名就要踢兩回合附加賽。
●利物浦
(主)皇家馬德里、(客)國際米蘭、(主)馬德里體育會、(客)法蘭克福、(主)燕豪芬、(客)馬賽、(主)卡拉巴克、(客)加拉塔沙雷、
●阿仙奴
(主)拜仁慕尼黑、(客)國際米蘭、(客)馬德里體育會、(主)布魯日、(客)奧林比亞高斯、(主)布拉格斯拉維亞、(客)卡拉特、(主)畢爾包
●曼城
(主)多蒙特、(客)皇家馬德里、(主)利華古遜、(客)維拉利爾、(主)拿玻里、(客)波杜基林特、(主)加拉塔沙雷、(客)摩納哥
●車路士
(主)巴塞隆拿、(客)拜仁慕尼黑、(主)賓菲加、(客)阿特蘭大、(主)阿積士、(客)拿玻里、(主)帕福斯、(客)卡拉巴克
●紐卡素
(主)巴塞隆拿、(客)巴黎聖日耳門、(主)賓菲加、(客)利華古遜、(主)燕豪芬、(客)馬賽、(主)畢爾包、(客)聖基萊斯聯
●熱刺
(主)多蒙特、(客)巴黎聖日耳門、(主)維拉利爾、(客)法蘭克福、(主)布拉格斯拉維亞、(客)波杜基林特、(主)哥本哈根、(客)摩納哥
●巴黎聖日耳門
(主)拜仁慕尼黑、(客)巴塞隆拿、(主)阿特蘭大、(客)利華古遜、(主)熱刺、(客)士砵亭、(主)紐卡素、(客)畢爾包
本文作轉載及備份之用 來源 source: http://hk.on.cc
|
鍾意就快D Share啦！
|
|
|