《2025香港小姐競選決賽》昨晚假將軍澳電視廣播城舉行，14位佳麗施展渾身解數爭奪港姐寶座，最終由陳詠詩登上冠軍寶座，亞、季軍分別為施宇琪及袁文靜，而一直狀態大勇的李尹嫣奪得「最上鏡小姐」及「友誼小姐」，跟「3料冠軍」擦身而過。
現年26歲的港姐冠軍陳詠詩，本身是藝術體操運動員的她，賽前信心十足，更憑其Big爆「湯碗胸」搶了不少風頭，不過昨晚她的整體表現不算突出，故當宣布她得到冠軍一刻，現場觀眾大感嘩然，亦未見有太多佳麗上前祝賀。事後她接受節目訪問時表示：「嚟到港姐呢個舞台，都係想做好自己本分，冇諗名次呢樣嘢，反而用運動員思考，平常心去面對，因為唔想影響心情，最緊張係問答環節，嚟緊好想做多啲慈善活動。」亞軍施宇琪則形容得獎「出乎意料」，她謂：「因為我唔係選美嘅人，性格好Man，依家證明毅力可以戰性一切。」季軍袁文靜聞得獲獎即時O嘴，感動到眼濕濕，獲大批佳麗主動送上祝福。
袁文靜搞笑搶分
昨晚決賽中的才藝表演環節，李尹嫣以花旦腔唱粵曲，曾為香港代表的陳詠詩表演藝術體操，成功搶鏡，而蔡華英的現代舞、施宇琪的古箏獨奏及文雅儀的花式跳繩，為她們各自帶來40票，齊齊於環節內奪勝。而袁文靜表演廣東話Rap雖被司儀錢嘉樂揶揄「聽唔明」，但勇氣可嘉兼搞笑。
泳衣環節時，大會順勢淘汰4位佳麗甘詠寧、岳凡荻、庄靜璟及何詠多，宣布遭淘汰一刻，庄靜璟呆立當場，大表失望。及後留低的佳麗答問題展智慧，施宇琪急才、口才表現甚佳，當被問到近日成全場熱話的「約食飯埋單借尿遁」事件發生在自己身上，會打給誰求救，她二話不說便答：「會打畀我嘅舊老闆，我辭咗職唔驚佢笑我，況且佢一定有8萬蚊幫我埋單。約食飯冇錢就唔應該食咁貴嘅，事前要預咗AA制嘛。」
賽前大熱的莫凡竟然5強止步，教人意外，5強李尹嫣、蔡華英、施宇琪、陳詠詩及袁文靜隨即展開拉票行動，用30秒時間自由發揮，李尹嫣自爆賽前被算命師批命今年運差，但依然堅持報名參賽，蔡華英承諾日後會開設跳舞學校以作承傳，施宇琪則坦言：「40磅我話減就減，我未必係最靚嘅港姐，但擁有獅子山精神，一定係最堅毅及勤力嘅。」陳詠詩直言以運動員精神回饋社會，今次參選旨在鼓勵香港人發揮無限可能，不諳廣東話的袁文靜則坦言：「4個月之前我淨係識講多謝同叉燒飯，之後用咗兩個月學唱歌同跳舞。」博得全場掌聲。
張敬軒打頭陣陪佳麗上戰場
歌手張敬軒、衛蘭（Janice）、李治廷及劉佩玥（Moon）昨晚擔任表演嘉賓，軒仔率先登場為決賽揭開序幕，穿低胸晚裝的14位佳麗陸續登場，他完成表演後送上祝福：「每一位Good Show！」他受訪時指多年前亦曾擔任港姐表演嘉賓，今次重返無綫感覺親切。問到可有心水？他對年紀最小的何詠多印象較深：「好大膽，雖然有部分佳麗廣東話講唔正，但佢哋好努力。」對於有網民表示為了他而睇港姐決賽，他說：「唔好咁講，港姐由細睇到大，返無綫好似返同學會。」
至於首次擔任港姐表演嘉賓的Janice獻唱兩首歌，大讚一眾佳麗又高又靚，她則只考慮過參加健美小姐。對於近日有傳她是「W姓小三歌手」，她澄清：「好瘋狂，我單身多年。（話嗰位歌手識唱歌劇喎？）我唔識。」而Moon慶幸有位閨蜜的老公是中醫，為失聲的她進行「急救」，唱《Stand By Me》時與10強佳麗重溫檳城的拍攝片段，一度哽咽。
馮盈盈變靚「峰」殺紅地氈
比賽前先在紅地氈上爭妍鬥麗。當中以馮盈盈最搏命，以低胸、大露背兼高衩晚裝上陣，前後皆有睇頭，「峰」殺全場。至於李芷晴堪稱「童顏巨乳」，谷出「超級碗」搶鏡，加上透視及高衩剪裁勁吸睛，跟盈盈不相伯仲；而平時打扮密實的郭柏妍難得性感，身穿的低胸吊帶晚裝胸下加入開窿設計。
盈盈被指打扮性感，她表示只是配合「愛麗絲夢遊仙境」主題：「同埋要多謝呢條裙，令到我更加有曲線同女人味。」講到外貌似有不同時，她解釋：「今晚有好多新嘗試，髮型、化妝都係歐美風，剪咗劉海髮型，好似有減齡感。」而芷晴稱刻意盛裝出席，試衫時也擔心太性感：「品牌話個個女仔都着到咁靚咁性感㗎喇，我覺得都係健康性感。」而郭柏妍自言今年做觀眾支持，對師妹們的才藝環節期待甚殷。
「一對新人」曾展望葉蒨文被玩
無綫戀綜《女神配對計劃》人氣CP曾展望（GM）與葉蒨文（Sophie）首度擔任港姐司儀，拍住前輩錢嘉樂及麥美恩。開騷前GM與Sophie聯同其他司儀錢嘉樂、麥美恩出來暖場，麥美恩介紹司儀陣容時，已經搞笑表示：「請大家多啲支持一對新人曾展望、曾葉蒨文。」葉蒨文連忙否認：「唔係，我姓葉。」節目開始時，麥美恩繼續以「一對新人」來形容他們，還表示：「呢對新人由女神節目到港姐舞台，可以公然拍拖，好多嘢真係無限可能。」雖然不停被玩，但Sophie與GM全程都非常淡定，當司儀的表現相當之好，獲得不少網民讚賞。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
