賓菲加候選會長同團隊現身曼市打吡。
曼聯開季成績差勁，上場打吡戰吞3蛋後，領隊魯賓艾摩廉帥位再亮紅燈，不過呢位葡萄牙教頭唔憂失業，據報葡超名牌賓菲加已向佢招手，候選會長同佢團隊周一(15日)更現身曼徹斯特，疑為引入艾摩廉做準備。消息指曼聯目前仍無意換帥，10月份或會係決定性月份。
據葡萄牙《球報》報道，賓菲加喺10月底舉行會長選舉，大熱門諾羅亞盧比斯一直心儀艾摩廉，競選成功就會出手搶人，佢同候選副會長兼前葡萄牙國腳紐奴高美斯、候選總監柏度費拉拿，日前齊齊現身「曼市打吡」觀戰，此行目的就係艾摩廉。
紐奴高美斯係艾摩廉前隊友同好友，呢位前葡萄牙射手喺出發英國前被問到邀請艾摩廉話題，佢就表示：「艾摩廉係曼聯領隊，我唔可以回應呢條問題，不過艾摩廉終有一日會教賓菲加。」事實上，艾摩廉球員時代踢賓菲加青訓，亦曾為球會效力9年。
艾摩廉嘅去留可能要到10月先決定，英國《每日郵報》消息指，曼聯高層對艾摩廉仍有耐心，目前無意換帥，但呢份耐性好視乎曼聯之後成績，佢哋喺10月中嘅國際賽前，會對車路士、賓福特同新特蘭，如果表現繼續低沉，加上諾羅亞盧比斯選贏賓菲加會長，或會引發骨牌效應。
本文作轉載及備份之用 來源 source: http://hk.on.cc
|
鍾意就快D Share啦！
|
|
|