「國民CP」葉蒨文與曾展望（GM）在戀綜配對成功，由螢幕CP成為真情侶，GM向女神連講3次「我愛你」，又兩度上演霸總式世紀之吻，放閃無極限！同樣配對成功的羅毓儀與林俊其徇眾要求下咀嘴派糖，事後女方害羞得瘋狂捶打對方，另類放閃。
無綫戀綜《女神配對計劃》開播以來大受歡迎，前晚播出大結局，錄得最高收視19.3點，有125萬觀眾收看，成績甚佳。兩位女神葉蒨文（Sophie）與羅毓儀（Yuki）在毫無懸念下，分別與求愛勇者曾展望（GM）及林俊其（Kris）配對成功，可謂眾望所歸。節目台前幕後相約觀看大結局，再直落派對慶功，玩得相當盡興。
節目上，GM對Sophie連講3次「我愛你」，再來個霸總式世紀之吻，女方開心到揼地尖叫，成為全城熱話。慶功宴上，兩人在全場起哄下還原世紀之吻10秒，但當倒數到3秒時，Sophie突然向後縮兼用手掩面，被要求重來，GM最後在女方的額頭及臉珠各錫4次才過關，彷彿結婚現場，全程甜到漏。派對上，二人再成目標被起哄錫錫，輪到Sophie主動親吻男方臉珠，受寵若驚的GM笑言要飲水定驚，二人又手拖手合唱情歌《情非得已》。兩人節目中的親吻片一夜間衝破200萬點擊，來自18個城市的CP粉絲更為他們準備了一個「官宣應援」在旺角投放，相當犀利。
相比GM的霸氣之吻，Kris就含蓄得多，他在最後告白中承諾：「無論發生乜事我都會陪住你，因為太陽嘅後面都會有個月光，你可唔可以做我女友？」Yuki兩秒已轉身答應，Kris開心得親吻女方面頰。慶功宴上，Kris錫完女方面頰再錫額頭，但全場不肯收貨，大叫「咀佢」，Yuki笑稱自己的嘴長在額頭上企圖迴避，最終Kris在群情洶湧下捉實Yuki肉緊咀嘴，錫完後Yuki瘋狂拍打對方，二人公然打情罵俏。
「得佢先可以食住我」
Sophie事後大爆GM不為人知一面：「佢好男人、好Man，有時會霸總上身話『埋嚟，錫啖』，私底下係佢話事，我係比較聽話。」她自言向來強勢有主見，但面對GM就變成小女人：「得佢先可以食住我，對住佢我可以好似小貓咁好聽話。」而她接受本報訪問時表示：「我冇乜壓力，我覺得呢一刻大家都係真，亦會盡力守護呢段關係，未來嘅嘢冇人可以寫包單，過分去諗聽日會點或者有咩危機都冇意義，目前我對呢段關係充滿信心。」至於GM受訪時，被問到在全城關注下拍拖，會否很大壓力？他坦言：「少少啦，藝人拍拖唔多唔少都有壓力，公開與否都有佢嘅優缺，我專注喺享受大家嘅祝福嗰面。（有冇諗分手點算？）冇呀！我做事比較抱住會成功嘅心態，即使分手，大家成年人會有成熟嘅處理方法。（對呢段情好有信心？視對方為結婚對象？）信心要有嘅，不過啱啱先開始，循序漸進，踏實行好每一步先。」他又在社交網發文多謝Sophie在他最低谷時無條件相信他，成為他想長大的推動力，Sophie甜爆回覆會做他後盾。
而Yuki受訪時坦言大感不捨：「依家節目順利播完，我哋可以更加自然咁相處。」問到公開拍拖會否有壓力？她稱：「配對成唔成功都會有壓力，最緊要大家睇得開心，希望得到大家嘅祝福，之後順其自然，希望大家畀啲空間我哋慢慢發展。」
Matthew示愛送吻 關嘉敏怕醜匿雪櫃
關嘉敏（Carman）在前晚《女神配對計劃》大結局中，喊住放棄姜卓文（細John）及黃家俊（Matthew）選擇單身，不過節目結束後有下文。Matthew在直播期間向Carman強烈示愛，令她失控尖叫、揞耳及匿在枱底，然而Matthew加大力度對住鏡頭再說多次：「關嘉敏，我係對你有Feel嘅！」令怕醜的她匿在雪櫃，其後Matthew送上Birthday Kiss後，見她在廚房跑步及撥手降溫，向鏡頭撒嬌說：「唔好再影喇！」
昨日Carman接受訪問時表示不會因Matthew夠主動而加分：「因為佢喺群眾壓力下先咁做，但都開心嘅，節目完咗後，佢間唔中都有搵我傾偈。」又謂全是自己的選擇，所以配對失敗未感失望，感恩節目令她認清常忽略自己感受的缺點， 終重拾戀愛感覺，又謂：「初時抱住玩嘅心態，點知自己咁快『沉船』，心情大起大落，比戲劇更戲劇化。」雖然覺得參與節目如裸露人前又虐心，但如再有下季綜藝必做足準備，有信心配對成功。
李芷晴拒愛寧食白果
藝人李芷晴在節目中最後未能配對成功，不少人戥她感到可惜，她受訪時表示未有因此而感失望：「因為我喺過程中有好多得着，學習到好多嘢，亦對自己了解多咗，反思咗好多自己嘅問題。」她自認以前很容易墮入愛河，但受以往失敗的戀愛經歷影響，加上已達適婚年齡，對投入一段新感情會變得謹慎。
芷晴稱最後要狠心拒絕求愛勇者Jacob時，內心掙扎良久，拍攝當日向不同人問意見，她坦言意識到自己的問題所在，認為先解決自己的問題再開展一段新關係會比較好。她指可能有些網民覺得她想找一個條件更好的人，她否認：「喺我心目中愛情唔係一份清單，唔係邊個條件符合更多就選擇邊個，而係遇見一個特定嘅靈魂，然後發現成個世界因此而變得唔同。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|