海倫近期入球停不了。
丹麥前鋒海倫離開曼聯後大翻身，由「水貨」變成超級神鋒！周五(10日)凌晨世盃外歐洲區C組，丹麥作客6比0狂數白俄羅斯，弗爆嘅海倫再交出2入波同1助攻，近3場比賽貢獻5入波同1助攻。丹麥領隊列馬賽後不忘諷刺曼聯，指海倫喺英超失意係畀「紅魔鬼」拖累。
作客嘅丹麥14分鐘領先，5分鐘後海倫近門勾射拉開紀錄；45分鐘柏德列多古勁射被救出，海倫門前補中入到第2球，呢位前鋒喺返更衣室前再投桃報李，助攻柏德列多古射成4比0。丹麥下半場由安達斯戴耶入多2球埋齋，最終大勝6比0完場，喺C組3戰7分排榜首。
海倫上季所有賽事加埋入11球，但自夏天由曼聯轉會拿玻里後，踢9場比賽就貢獻7入波同1助攻。就連國家隊表現亦截然不同，海倫喺曼聯最後16次為丹麥上陣只入1球，轉會後3次為丹麥上陣就入3球，領隊列馬賽後亦不忘諷刺曼聯累人。
列馬表示：「以海倫嘅能力，踢意甲同英超都冇問題，佢喺意甲發威，唔代表佢唔適合英超。事實係海倫依家搵到一隊運作良好嘅球隊，搵到一班肯幫助其他人嘅隊友，海倫嘅踢法係需要隊友去配合，有好嘅球隊同隊友，比起佢踢邊個聯賽更加重要。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
