影帝梁朝偉今日（9日）為滙豐銀行拍攝廣告片，受訪時被問到有何理財投資心得可分享？他笑稱是來助興，並非分享心得，透露近來主要忙為首部拍攝的歐洲電影《Silent Friend》宣傳出席不同影展，他説：「第一個去威尼斯，跟住多倫多、釜山，四圍都會去，因為有好多小小嘅電影節，可能仲有巡迴宣傳，因為本身係德國電影，所以德國上先，安排咗明年1月上映，可能歐洲其他地方會陸續上映，琴日聽講北美都買咗。」他表示香港、內地亦會上映，但上映時間未落實，相信屆時會開始輪到在亞洲各地做宣傳。談到電影在威尼斯電影節得好口碑，很多人也認為他會獲獎，但結果卻未有成事，梁朝偉對此未有失望，認為電影能獲得很好的評價和反應，亦獲得幾個獎項，自己終於看到完成品感覺高興，直言團隊由準備到拍攝完成的過程中，能有一段很愉快的時光才是最重要。提到電影中有一幕全裸戲份，不少觀眾看後都表示震撼，他笑謂：「唔係吖，《色戒》震撼好多！（喺大自然拍裸戲舒服好多？）好唔一樣嘅，你到時睇吓咪知，哈哈！（事前要做準備？操肌？）唔使啩，做咗咁多年，又唔係參加健美先生！」
問到現時會如何選擇電影接拍？梁朝偉坦言人比劇本更重要：「導演先係重要，因為人係最有趣，同一個故事，如果4個唔導演拍，會有4種唔同表達方式、方向，所以我覺得人先係最重要，睇佢點樣去表達一個故事出嚟。」談到他早前到釜山電影節，問到有否獲韓國片商邀請拍電影？他説：「有呀，但真係好難，韓國話真係好難學，我睇完湯唯之後我好佩服，真係一個很難學嘅語言，有機會我都唔介意嘅，只要解決到語言上嘅障礙。」提到韓國型男宋仲基表示很想跟他合作，偉仔表示知道對方，指現在有很多不同串流平台，透露近年的劇本中都會有很多不同國家的演員參與，故相信一定有機會合作。問他會否考慮拍韓劇？他再次笑指韓語有難度。談到他早前接受陳冠希訪問，當中自爆有不少可愛習慣例如穿鴛鴦襪，他笑謂：「令自己開心啫，整啲嘢氹吓自己，食吓雪糕、着得意嘅衫，係一種小確幸。（佢話你型過佢！）我唔敢。」問到對方以甚麼打動他接受訪問？他指沒甚麼特別，對方邀請自己便應承。
另談到他下年會為在港舉行的Dragon級別帆船世界錦標賽擔任活動大使，偉仔搞笑指是「畀人捉去」，表示曾跟友人到匈牙利參加了一場國際帆船賽並獲得亞軍，當時就是這個級別，他説：「有60隻船，賽1個星期，每日6點賽到下晝5點，賽咗3場。今次咁啱喺香港搞，都係國際盛事，全世界好多呢個級別嘅帆船世界冠軍、奧運冠軍都會嚟，我覺得呢個運動好值得推廣畀後生仔。（你會落場比賽？）唔知到時會唔會開緊工，暫時話會落去賽。」
談到工作，梁朝偉表示正在看劇本，透露除了電影更有電視劇、網劇邀請：「因為依家有好多平台，有啲唔係一部電影，或者拍6、7集嘅都好流行。有時拍吓呢啲都幾好玩，佢嘅長度係可以更好玩啲，通常拍一個Season，好嘅先繼續再拍，唔好就Cut咗佢。」他表示不是內地劇或港劇，預計起碼明年才開始拍攝，暫時專注為電影宣傳。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
