將於周六及日（4日及5日）假香港中環海濱活動空間舉行嘅《WATERBOMB》音樂節，尋日（1日）突然宣布因天氣因素延期，消息震驚已購票嘅粉絲，主辦方在宣布消息後，更被發現將所有宣傳帖文火速隱藏，猶如事件從未發生，引發粉絲強烈不滿。
主辦單位發出公告，指根據香港天文台於9月30日天氣預報，預測本周末極有可能出現強風並發出熱帶氣旋信號，基於安全考量，決定將活動延期。今次音樂節陣容鼎盛，包括Anson Lo、COLLAR、韓國天王RAIN、性感女神權恩妃及男團NCT 127等，一早引發搶飛潮，令港韓狂迷引頸以待。而官方於公布延期後，竟將社交平台嘅宣傳帖文全數刪除或隱藏，處理手法令人費解，已購票嘅樂迷心感極唔尊重。
面對網友連環炮轟，主辦方發出正式聲明，向所有受影響的觀眾致歉，提到上周颱風「樺加沙」吹襲香港帶嚟影響，令佢哋深切體會到安全嘅重要性，強調：「在此等不可避免的情況下，我們以觀眾、藝人及工作人員的安全為首要考量，遺憾地通知各位，我們不得不宣布將原定檔期之活動延期。」主辦方承諾，已購買嘅門票將會安排全額退款，而延期後嘅演出日期及相關詳情，將於近日另行公告，懇請各位體諒並繼續支持。大批粉絲對此說法完全唔收貨，質疑颱風只係藉口，實情係門票銷情不理想，因去年演出同樣出現熱帶氣旋「馬力斯」襲港下開騷作對比，怒轟主辦方雙重標準。
加上今年《WATERBOMB》門票分四種，由最平單日票$880到最貴VIP雙日票HK3,280四款，唔少專程來港嘅粉絲更損失慘重，一早已預訂好機票同酒店，如今行程被迫取消，所有費用隨時化為烏有，粉絲們怒轟主辦方處理手法，有海外粉絲更絕望地表示今日（2日）就上機，大會尋日先公布延期消息，令人不忿。
本文作轉載及備份之用 來源 source: http://hk.on.cc
|
鍾意就快D Share啦！
|
|
|