《香港01》前晚（4日）聯絡上羅蘭姐，電話中傳來聲線較柔弱欠中氣，但對答如流，十分精靈。羅蘭姐透露數月前曾在家中跌傷入院，並要留醫做不同身體檢查，住足八日。她說：「嗰次跌親，依家手臂仲有少少痛，幾個月前跌倒嘞。嗰朝早七點，屋企電話響，我發茅趕出去聽電話，哎吔，趕到去廳度，我就成個人撻咗喺廳。」羅蘭姐指當時好痛，不能夠自己起身，故吩咐工人姐姐立刻致電999召喚救護車送入醫院，她續說：「醫生照過晒好多嘢，佢話好啦，咁第二日返嚟做物理治療，住咗8日，俾咗好多藥膏我，早又搽晚又搽吓咁囉。」
羅蘭姐指自己身體會出現不同痛處，她說：「你唔知佢乜嘢痛㗎，好地地瞓醒冇事喎，但忽然間有一朝佢又腳痛喎。一講起痛呢，唉，個個朋友都話係咁㗎嘞，依家我哋咩年齡呀，呢度痛嗰度痛，佢鍾意就痛，唔鍾意就唔使痛，真係。」
對於腳踝有離奇的深痕，電話中的羅蘭姐亦緊張問工作人姐姐，小心查看後表示沒有異樣，並解釋：「嗰套戲服嚟，自己對襪頭箍得太緊 ，冇事，嚇親人！」她否認有腳部水腫或是靜脈曲張等問題，就連老年人常見的「三高」高血壓、高血糖（糖尿病）和高血脂都沒有，各項指數正常未有超標。
而羅蘭姐亦很敬業，指《金式森林》是年多前拍攝的劇集，現在才播出街，一眾演員均非常期待。對於工作人員安排「太后寶座」，羅蘭姐笑說：「套戲我做嗰間屋主人，我係最大年紀阿嫲，成班孫仔孫女，拍戲都係呀，又俾張櫈我坐，等阿嫲鍾意鬧邊個就鬧邊個。」問到是否永不言休？她說：「有劇開要我會拍。（會否擔心體力未能應付？）唔係話拍打戲，拍屋企戲冇問題，做得幾多得幾多，好似胡楓92歲，仲紮紮跳。」她透露將於10月10日出席主題公園的哈佬喂活動，雖然不用扮演「龍婆」，但大會將安排櫈讓羅蘭姐坐下跟粉絲合照，與眾同樂。
本文作轉載及備份之用 來源 source: http://www.hk01.com
|
鍾意就快D Share啦！
|
|
|
