「（多咗人認識）當然係開心，收獲咗大家咁多支持。網上面咁多fans，除咗讚我都會有好多有建設性建議畀我，從觀眾角度話俾我聽，點樣會好睇啲，我自己都會好用心咁去睇，睇吓點樣去改進。」
會有網民說，他因為葉蒨文而被人所認識。他亦坦言：「我唔會介意，因為呢個都係事實。我的確係參加咗，先有機會多啲人認識我。我反而會聚焦係開心位，透過呢個節目多咗人了解我個人係點，開始對我有興趣。」
他透露，自己個性喜歡「氹人開心」，所以入行也算是適得其所。「有機會氹大家開心，我都開心。」約6年前透過《#後生仔傾吓偈》而入行，他直言當時並沒有思考太多，只是本着一個讀書以外兼職的心態，後來才將做幕前成為職業。
全職做藝人，幾乎每位都曾經歷過辛酸。他分享說：「我相信唔係得我一個，有好多人都要喺呢一行磨練好耐，尤其係而家經濟大環境都唔係幾好，我都係其中之一個啫。我唔敢話自己好辛苦，我都係屬於比較幸運嘅一群。我已經好感恩。」
談到辛酸史，他表示曾經有好幾年時間，因為收入不足而需要外出打工去支持自己做幕前。「去到真係唔夠洗嘅時候，就要做兼職。（做咩兼職？）呢個就唔方便透露，兼職啦，收入都比較唔穩定，咁我就搵方法令自己可以繼續追夢。時間比較flexible，可以自己挑選時間。」
有沒有曾被批評「不如轉行，唔好做幕前啦」？他回答：「又真係冇人話我唔適合，反而有一段時間，我覺得自己唔適合。有一段時間，我自己懷疑自己。我覺得自己懷疑自己，比人哋懷疑自己更難處理。度過呢段時間，都落咗幾多苦功。我聽過自己懷疑自己，喺呢個娛樂圈好多人都係必經階段。（懷疑啲乜，懷才不遇？）可能有陣時係緊張，緊張就影響咗發揮，自己就Focus喺結果上面，而唔係點解自己做得唔好，但係靜心落嚟，其實做得唔好係因為緊張，咪處理自己緊張問題，下次就睇吓有冇第二個發揮。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
