新特蘭女球迷喺看台上捉到一隻老鼠，放在一個膠杯內。
曼聯主場奧脫福鼠患問題再度受關注！網上有圖片瘋傳，上周六(4日)新特蘭作客曼聯，有「黑貓」女球迷喺看台上捉到一隻老鼠，放在一個膠杯內，事件引起廣泛關注，「紅魔鬼」鼠患問題已持續近一年，反映球會管理確實出現問題。
呢件「黑貓捉鼠」事件，發生喺上周曼聯2比0擊敗新特蘭嘅英超，有球迷上載有關圖片，老鼠似乎仍於杯內亂竄，該球迷表示「奧脫福可以有幾污糟？作客球迷看台嘅一位女士，啱啱就捉到一隻老鼠」，呢名球迷謔稱，自己喺睇波生涯，已經冇嘢未見過。
奧脫福自2024年11月開始，鼠患問題呈現，去年11月曼聯餐廳因鼠患問題被勒令暫時停業；12月衞生部門發現球場內有老鼠糞便。到咗今年頭兩個月，更有超過1次，喺比賽當中有人影到球場草皮有老鼠亂跳，今年5至6月有關當局巡查期間，有7個區域都有老鼠屎，衞生評級維持低位。
其實奧脫福球場長年都有衞生問題，南北看台及辦公室曾於2015年出現嚴重鼠患，有分析指奧脫福球場鄰近河邊及鐵路，容易出現鼠患問題，加上近期又天花漏水，「紅魔」球迷指出，要徹底解決問題，就係成個球場重建。
本文作轉載及備份之用 來源 source: http://hk.on.cc
|
鍾意就快D Share啦！
|
|
|