無綫花旦陳曉華表面開朗，但原來一直受負面情緒影響，近年更遭受社恐困擾，直至去年才走出難關。她認為演戲可以療愈人生，前輩郭晉安、黎耀祥及佘詩曼等人的每句名言及教誨，都讓她終生受用。她現時全副心機投入演戲，皆因此舉為她帶來安全感，亦讓她找到人生目標。
今年踏入3字頭的陳曉華（Hera）踏入人生另一階段，由選美入行到成為無綫力捧花旦，7年來有不少「貴人」相助，獲得不少好機會。她在現時熱播中的台慶劇《金式森林》遇上既複雜又有發揮的角色，劇中與郭晉安譜忘年戀，由「小白兔」變為復仇「黑寡婦」，角色反差極大，她接受東網專訪時坦言：「本身復仇係想好有氣場去演，劇中安哥（郭晉安）走咗，知道老公係利用我，向來相信愛情嘅我頓時晴天霹靂，變咗一個支離破碎嘅女人，自己代入咗個角色後，由小白兔變成一個癲癲哋嘅怨婦，進入咗瘋婦嘅世界，但好好玩，人生第一次感受到心碎嘅感覺。」
阿佘當頭棒喝
Hera的演技不斷進步，直言多得前輩加持，回想之前拍攝《新聞女王》時，佘詩曼第一場戲就對她當頭棒喝，提點她要用真心演戲，才能感動觀眾，她說：「其實阿佘只係同我講咗一句，但係呢句話好受用。每個前輩都有名言，同黎耀祥拍《巾幗梟雄之懸崖》時，佢同我講：『你要識得珍惜，先至唔驚失去。』」今次與郭晉安合作，對方以另一方式點化她：「安哥係身教，佢好識得睇人嘅優點，我以前係雞蛋裏挑骨頭嘅人，挑自己、挑人哋嘅缺點，同佢開工發現，點解佢睇到人哋優點，我就淨係睇到缺點，覺得自己咁樣唔好，改變之後，心情愉快咗、睇嘢唔同咗，冇以前咁執着，連演戲都會嘗試唔同方法，無敵有用。」
現時網絡發達，無可避免會受到負評攻擊，面對這些，過往Hera情緒猶如坐過山車大上大落，現在則成熟不少，懂得轉化批評，情緒亦平穩得多，她說：「以前連自己都負評自己，最唔開心係認同負評，覺得自己真係好醜、好差、一事無成，以前容易畀人影響，畀人一句說話就打沉，一句說話又令到我好似飛到上天升仙咁。」後來她領悟到睇負評要轉化、要「排毒」，向其他角度看，握緊自己宗旨就不會受影響，她指雖然未去到「佛系」百毒不侵，但已經大有改善。
面對外間的質疑，Hera情緒最受困擾時曾出現社恐情況，不願出街，見到人會緊張到「硬晒軚」，她直言：「最嚴重係去到人多地方，會覺得時間好似過得好慢，一秒好似變咗一個鐘咁長，有人行過會忍唔住望吓人，睇吓佢係咪望緊我？會驚同埋有好多質疑。」表面樂天的她原來一直受社恐困擾，直到去年才擺脫困局：「可能有階段性，上年社恐去到盡頭就消失咗，依家完全冇事。就算肥咗啲都唔會好驚，咪慢慢減囉，唔使咁大壓力嘅。」
睇書學識感恩
走出社恐難關，全靠她找朋友傾訴及每日寫日記，亦慶幸朋友介紹了一本書，教導她學習感恩，發現沒有甚麼好埋怨。戲如人生，人生亦如戲，Hera指演戲療愈了她的心靈：「真心講演戲嘅路上，療愈咗我整個人生，如果冇做演員，可能仲係好抑壓、壓力好大、好負能量，諗嘢好悲觀，但呢段時間改變好多，變得正能量多咗，因為演一個角色，自己會用第二啲角度諗一件事，變成有同理心，慢慢個人完全唔同晒。」
隨住經歷累積，Hera覺得人生也是時候要換一個想法，特別在郭晉安身上學到做人道理：「喺佢身邊好安心，諗咗好耐呢份安心感覺係咩嚟？其實就係唔會畀人影響，知道自己做咩、想要咩。同埋學習佢只係睇到人嘅優點，依家自己都淨係睇到人嘅優點，好鍾意依家嘅狀態。」
服裝：Harvey Nichols
場地：The Luxe Manor
本文作轉載及備份之用 來源 source: http://hk.on.cc
|
鍾意就快D Share啦！
|
|
|