曼聯今場殘陣出戰。(Getty Images)
周三(31日)凌晨英超，曼聯喺主場迎戰12連敗嘅「包尾大幡」狼隊，結果醜怪打成1比1平手，就連場面都唔及作客嘅狼隊。完場後奧脫福球迷狂噓領隊魯賓艾摩廉，呢位葡萄牙教頭今場排陣、換人都受到詬病，成為失分「箭靶」。
曼聯今場殘陣出擊，不過對手係全季只得2分嘅狼隊，多數球迷都覺得曼聯游刃有餘，約舒亞舒克斯喺27分鐘先開紀錄，更令人深信曼聯「實食冇黐牙」。勢估唔到狼隊愈戰愈勇，完半場前靠角球攻勢，由卡積治追成平手。
半場期間，艾摩廉離奇收起入球功臣舒克斯，之後換入中堅約羅同小將文達度，連串換人都令球迷睇到搲爆頭。曼聯未能爭勝之餘，場面上甚至唔及狼隊，預期入球(xG)曼聯只得0.81，相反狼隊有1.02。狼隊未能贏波，成為自1903年嘅保頓後，英格蘭頂級聯賽122年來首支頭19場聯賽不勝球隊。
曼聯上場改踢4後衞陣式擊敗紐卡素，但艾摩廉今仗又轉番最愛嘅3後衞陣式，加上換走舒克斯嘅決定，名宿加利尼維利質疑：「艾摩廉賽後有排受，我唔知舒克斯受傷定咩事，但呢個換人好奇怪。球隊近期調整戰術，近幾場明明踢得好咗，但今場又用番3-4-4。」
艾摩廉賽後解釋換走舒克斯：「呢個係戰術需要，有時唔係打多個前鋒就係加強進攻，我哋要同狼隊搶控球權，我只係根據需要去換人。曼聯同一時間有好多人缺陣，我哋依家要恢復球員，並且等踢非國盃嘅球員歸隊，所有人返嚟後我哋會變得好強。」
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|