1億票房後出《尋秦記》加長版 古天樂透露加入：接近20分鐘
《尋秦記》票房臻至6600萬元，古天樂與宣萱於慰勞宴上接受傳媒訪問時，表示希望向更高目標進發，至於加長版推出時機，古天樂則透露：「我諗起碼都過億」表示目前正在籌備加長版後期製作工序，強調不保證能面世：「真係有機會未必播到，但我希望播到嘅。」亦透露將加入項家生活片段、山寨對大王不滿情節，亦與善柔戲份有關：「打戲剪咗好多，放唔晒落去。仲修剪緊，十幾分鐘接近二十」
古天樂回應疑似演員片酬榜真偽 宣萱：冇人工都拍
早前內地網上流傳疑似《尋秦記》演員片酬榜，宣萱卻表示對數字沒有印象：「我真係唔記自己有幾多片酬。」古天樂則笑言：「片酬妳唔記得，Threads啲數字妳又記得㗎喎！」宣萱則沒好氣地表示：「咁你吹雞拍就梗係拍冇人工都拍」古天樂則回復正經，統一代所有演員回應片酬真偽：「呢個係一間公司嘅商業秘密，係唔可以講出去嘅！」
古天樂開通Threads帳戶：PR就係我、我就係PR！
最近新開Threads帳戶的古天樂，笑言第一文寫上66個「入定」，本來想大家找出其中的「人」字，亦順道慶祝票房成績。古天樂表示該帳戶由自己親自經營，笑言：「其實PR就係我、我就係PR！」一直非常活躍於Threads的宣萱，笑言：「我即刻得閒咗！（發覺追蹤數被超越？）正常呀！佢未開戶已經十幾萬，我好辛苦先儲到！」古天樂隨即開玩笑：「你講到好似強積金咁！」當宣萱談到每日努力經營：「一擘大眼就上去！」古天樂又再開玩笑：「上去邊到呀？」令宣萱不禁反白眼、側身撞開古天樂！
《天命最高》入定人定之亂 古天樂：係我身上嘅曼德拉效應！
至於〈天命最高〉歌詞中「入定」與「人定」的問題，引發網民討論搞清楚記憶之亂，古天樂表示是發生在自己身上的曼德拉效應：「我同林峯錄音嗰日，記得自己以前係唱『入定』，問趙增熹之後播返原版，又真係『人定』！我搵返以前Live嘅版本，都係唱『入定』，我覺得真係我身上嘅曼德拉效應！有啲人以為我以前唱錯、今次唱啱，我連今次合唱都係『人定』，只係資料摷到係『入定』。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|