否認被「雪藏」
問及早前是否被公司「雪藏」，現在已「解凍」，鍾柔美回答：「其實公司係冇雪藏我嘅。同埋最近我都見到好多唔同嘅新聞，都有寫好多唔同嘅嘢，我自己都的確係好唔開心嘅。所以我前排都休息咗一陣。但係今次呢，我就好開心可以出返嚟去見返我啲粉絲啊，見返好多唔同嘅演員啊。就真係突然之間返返去拍《特勤女團》嗰陣嗰個畫面。」
陷低潮獲家人力撐
談到早前的心情，她坦言曾經因事件而陷入低潮：「都有段時間嘅，但而家都OK。（朋友有冇關心你？）一定有嘅。佢哋每一次……真係開一開個電話都見到我咁樣，佢哋都有問我有冇事啊。都好開心有屋企人、朋友嘅關心。（父母呢？）有，一定有啦。屋企人嚟㗎嘛。屋企人永遠喺我心入面係佔最大嘅一個位置。佢哋無論如何都會好support 我，同埋都會撐住我。所以佢一定會關心我。」
承諾日後對異性「劃清界線」
提到網民對於她的新聞十分關注，她直言沒有太留意網民的言論：「前排有睇嘅，但係我覺得comment呢啲嘢，即係大家其實都有佢哋嘅睇法。我都冇得控制大家喺個comment上面或者個鍵盤上面寫啲咩。所以我覺得最緊要就係我自己可能我今次做得唔好，咁我希望未來我都會做得更加好俾大家睇。」
問到以後外出慶祝時，會不會「小心啲」，她回答：「冇諗咁多。我諗呢個係一定要留意嘅。但係我覺得識朋友呢啲嘢順其自然囉，啱傾咪做friend囉。但我自己對於異性呢樣嘢都會再小心啲。同埋我都希望可以畀到對方個感覺就好似真係有一條界線喺度咁樣。」
拒認劉展霆係男友！狠心降級
再講到「男朋友」劉展霆有沒有關心她的話題，她就糾正，說：「咩男朋友仔？（指劉展霆Edan）呢位朋友都有關心我，但唔係男朋友仔，係『朋友』。」記者再追問，為甚麼關係出現了變化，她也回答：「我同佢退返去朋友，有啲轉變。係啦，因為有好多新聞啦，大家都好關心大家呢樣嘢，但我都希望喺呢度同大家講聲，喺感情上都可以畀返少少空間我。因為我覺得我都要去處理好多唔同嘅嘢，同埋我希望自己都可以搵到自己嘅重心，即係工作啊、學業、感情呢啲嘢去慢慢再去balance返。」
後悔14歲自稱「A0」 認錯嘆：冇人教我點樣講
會不會後悔當年在《#後生仔傾吓偈》時表示自己是A0？她想了想，回答：「我可以話係有少少後悔嘅。因為細個啱啱入行，我就真係唔係好識諗……14歲……咁就冇人教我點樣去講呢樣嘢。咁的確都係我自己嘅錯啦。因為經過到到今時今日大家都真係放大嚟講啦。但係講起黑歷史，我覺得呢啲係人生嘅經歷嚟嘅。我諗大家唔係個個人都會經歷呢樣嘢，但係一個階段，係需要時間去磨合或者去經歷。」
獲樂易玲開綠燈力保
經歷過這件事之後，她表示公司高層傾向關心多於責備。她回答：「樂小姐都好關心我嘅，同埋公司都冇畀任何壓力我。我覺得最緊要就係做好自己嗰part。之前做錯咗嘅，咁就要證明返畀大家睇。樂小姐都好支持我，畀好多機會我。未來嘅路應該點樣去行，啲意見佢都有畀我聽。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|