尋日（16日）係年廿九除夕，亦係年宵花市最後一日擺檔，唔少藝人傾巢而出去感受節日氣氛，當中就好似男團MIRROR人氣王姜濤咁，佢住開銅鑼灣、愛到維園打波，今次佢都有現身維園行花市，仲約埋幾位圈外好友齊齊過年，偶像襲花市，實行與眾同樂，唔怕身份曝光！見佢去到花市拎住大桔合照，意外透露佢以全黑打扮現身，雖然戴晒帽及口罩，但依然被大批市民認出，個個都想同男神合照。由佢上載嘅短片中見到，佢陪好友去到一個猜枚檔小賭怡情，佢本人未見有參與，但就為好友拍片。片中檔中男生認出佢，即時嚇到呆咗，多次喪問「你係咪姜濤？」同檔女生直頭叫出聲，低聲狂叫「姜濤」，大家都一臉不可置信，唔敢想像眼前人正是紆尊降貴嘅姜濤，難得佢享受生活，自在行花市，確係開心。
大量網友見到姜濤晒出年宵打卡相後，都留言狂讚佢，指佢係真正偶像：行花市、打街波、做自己，極度親民唔係個個學到，又有人大讚佢真心夠晒Man，能夠咁大膽微服出巡，唔係個個偶像都做到好似佢咁貼地！
另外，情侶藝人葉蒨文（Sophie）及曾展望（GM）都被目擊孖住行花市，靚仔靚女打風都打唔甩，新年當然都要Sweet住過，仲齊齊「搵食」食小食醫肚仔，令人羨慕。同樣孖實出動嘅仲有林作及裕美，兩個去到狂買小食，又走到去「億萬駙馬」伍富橋及富家千金梁兆楹攤位及學校攤位齊齊叫賣，氹到一眾市民非常開心。
本文作轉載及備份之用 來源 source: http://hk.on.cc
|
鍾意就快D Share啦！
|
|
|