視后江美儀近日接受電台訪問，提到最近她憑2014年無綫舊作《名媛望族》深夜重播意外走紅，然而，當年卻因演「三姨太」遭全城鬧爆，對於當年播出跟現在反應兩極，美儀形容為「冇諗過」及「好奇妙」：「當然記得畀人鬧爆『黑絲儀』，又話我『重口味』教壞細路，幾十歲人仲搞埋啲咁嘅嘢。嬲？當年仲細，睇留言區會有唔開心，亦擔心會影響收視。依家有咁嘅回響冇諗過，亦唔係乜嘢平反，我形容係個好勵志嘅故事，因為你嘅付出，唔知幾時有人留意到你嘅努力，就要時刻唔好鬆懈，演好每一個作品。」
江美儀2013年已憑《衝上雲霄II》奪得「最佳女配角」，但之後曾被指囂張、乞人憎，經歷過不少高低潮，她自評：「我直腸直肚，個樣串串貢，唔識修飾，就會得罪人，有時得罪人咗人都唔知。」原來在2017年首孭女一的《親親我好媽》後，因為得罪幕後，數年無劇可拍：「就係第一次做女主角，樣樣嘢太緊張，重咗語氣，冇理人感受，令幕後唔舒服，之後冇人敢用我，咪拍綜藝；點知《街市遊樂團》又畀人鬧，真係畀人鬧足10幾年。」至於為何之後再有機會拍攝奪得視后的《下流上車族》，她笑言：「唔同層數嘛，明就明，哈！」
於事業低潮時同時遇上婚姻問題，江美儀坦承情緒曾一度爆煲，幸靠宗教及運動走出情緒低谷，問及單身9年的她是否仍對婚姻有憧憬，她說：「婚姻冇憧憬件事太複雜啦，但邊個唔想有個伴？結婚複雜嘅原因，唔只係兩個人嘅事，係涉及兩個家庭，你要兼顧好多嘢。既然我已經試過結婚，就試吓啲唔需要結婚9年來真係冇人出現過，條件真係無乜所謂，總之唔好孤獨終老。年紀大過我細過我都得，有仔女更好，我好鍾意細蚊仔，最緊要溝通到，三觀一致。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
