「亞視一哥」陳啟泰主持《百萬富翁》深入民心，近年主力內地發展的他鮮有在港露面，更曾一度幾乎消聲匿跡，只在去年與袁文傑敍舊時，驚見衰老走樣，但今年初他重新活躍為電影宣傳時成功回春，近日他更激罕剖白失蹤真相，原來患重度抑鬱，陷入人生低潮期。
他近日接受網上節目訪問，罕有談及家族有抑鬱遺傳，疫情期間因停工導致發病：「我媽媽後生失眠、抑鬱都好嚴重。我本身都有抑鬱，失眠咗好多年，疫情嗰幾年冇嘢做，香港啱啱又冇嘢拍，本來諗住拍完嘢就戒安眠藥，點知戒唔到，我知道係有啲嘢，最慘COVID又啱啱開始，驚出去睇醫生，中咗招要去隔離，如果我去咗隔離，你畀一罐安眠藥都冇用，因為我都瞓唔到，一定發癲，一定癲晒。」
他續指因諱疾忌醫令病情愈發嚴重：「個人情緒低落啦、抑鬱啦、驚恐啦」，更坦言曾有輕生念頭：「嗰陣我住20樓，成日經常望出去，『嘩！』咁樣走返嚟，但係冇衝動，我冇諗跳樓，只係突然間如果係世界末日，我拖住老婆一齊走都幾幸福」，幸好得太太立即放下所有工作，全天候24小時在旁陪伴渡過困境。而他最後亦選擇求診精神科醫生：「睇咗開始慢慢有轉機，精神病好番好多，呢個係我人生最最最痛苦嘅階段，我由170幾磅，跌到150多磅，後嚟食咗醫生啲藥，去到210幾磅，但呢啲係無止境，愈食愈冇效。其實喺一年前我仲未有戒藥，一路食緊精神科醫生嘅藥，每晚食六、七粒，朝早食兩、三粒，一定要食咗先瞓到，唔係會驚慌」，間接解釋去年被指走樣原來是藥物引致。
陳啟泰表示輾轉求醫，甚至用另類療法都未見成效，最終靠排毒療程令情況好轉：「喺大半年前開始戒咗好多藥，只需要食保健品已經可以瞓到，叫做拎返個健康，不過仲有4成可以進步，如果大家係過來人，千祈唔好驚，回復健康嘅道路係好困難。」
其實陳啟泰除亞視節目及劇集外，最令人印象深刻的，就是曾經分享飲尿治病心得，他引述《本草綱目》指飲尿是最正統的主流中醫療法，並指雖然飲尿並非萬能，但曾幫助他的姑姐風濕病10幾年都沒發作，不過就未有回應本人有否嘗試該療法。
防止自殺求助熱線：
香港撒瑪利亞防止自殺會： 2389 2222
生命熱線： 2382 0000
社會福利署： 2343 2255
撒瑪利亞會熱線(多種語言)： 2896 0000
醫管局精神健康專線： 2466 7350
明愛向晴軒： 18288
東華三院芷若園： 18281
「情緒通」熱線： 18111
賽馬會青少年情緒健康網上支援平台「Open噏」：http://www.openup.hk
東網網站 :https://on.cc/東網Facebook專頁 :https://www.facebook.com/onccnews/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
