藝人施明於年前因意外頭部重創，需要接受開腦手術，之後康復返家。怎料日前突然病情急轉直下，最終因肺炎離世，享年74歲。兒子李泳漢至今仍未能接受，更哽咽表示：「我仲想同佢走埋落去，唔係想送佢最後一程。」聞者心酸。
李家鼎前妻施明於2022年12月不慎在家中跌倒，並要做開腦手術保命，但她憑着堅毅不屈的精神，留院接受治療一年，終於可以出院跟家人團聚。原本身體逐步穩定的她，於本月21日病情突然急轉直下，經過多番搶救無效，最終因肺炎離世，實在令人唏噓。
多年來照顧母親的李泳漢對於母親突然離世，至今仍未能接受，他在憶述施明最後一次入院時已泣不成聲：「其實媽媽一直有Keep住去醫院例行檢查，近年都冇咩大問題，通常住幾日就可以出院，今次入院都係話有少少血壓高啫！我記得佢走前大約一星期左右，突然接到醫院打電話嚟，話佢嘔嘅時候，啲嘔吐物落咗個肺，搞到含氧度好低，要即時插喉幫助呼吸，如果唔係就抖唔到氣……其後情況都一直好穩定，仲以為可以好快甩咗條喉返屋企……點知……嗰日清晨突然接到醫院電話，話我阿媽唔得、搶救緊，叫我快啲趕去醫院，結果去到佢已經走咗，我連最後一面都見唔到。」
李家鼎驚聞噩耗傷心難過
問到母親可有遺言時，李泳漢表示完全沒有，因深信母親可以大步檻過：「其實2024年尾，母親經歷過一次生死邊緣，當時佢因為尿道塞咗，細菌入血令身體好多器官衰竭，結果一個月內做咗3次開腦手術，連醫生都叫我哋做好心理準備，但我阿媽好厲害，完全冇放棄過治療，奇迹地出到院。之後身體冇試過再有大問題，估唔到今次反而會咁……」
李泳漢形容施明是一個偉大的母親，為了兒子未有再改嫁，她更是一個好太太，雖然與李家鼎已離婚，但仍很關心對方。他哽咽表示：「我仲想同佢走埋落去，唔係想送佢最後一程。佢從來冇放棄過仔女，任何委屈都自己吞晒落肚。佢真係好有愛心，完全視狗如命，由細到大屋企都養狗，佢成日同我講狗係好有靈性，比起人更加忠心。佢當啲狗係仔女咁，話佢哋係啞巴小孩，要對佢哋多啲耐性同特別關心。」
由於當年李泳豪結婚未有邀請李泳漢與母親施明，又公開大罵兄長向傳媒提及母親病情，因而爆出兄弟決裂，多年來不相往來。當談到可有將母親死訊告知對方時，李泳漢透露已通知父親李家鼎：「阿爺（李家鼎）會同佢講。（爸爸係咪好傷心？）當然好傷心，佢第一個反應『吓』咗一聲，當然都係接受唔到，唔能夠相信呢個事實。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|