中日混血兒裕美日前飛抵日本製作第二首全新日文歌《RainNote》及拍攝唯美MV，花費達6位數字，出動全日本班底，並抵達前日本天圑SMAP的御用錄音室，最大目的之一就是圓跟「老公」木村拓哉「親嘴」心願，完全當現任男友林作透明。
她在社交網直擊在錄音室「抽」木村過程的短片，指錄音室的咪正曾是木村錄音之用，雖然真人不在，但憑幻想都可以滿足欲望，見她兩度咀咪，更笑言：「就係咁舔木村嘅口水，我特登Book呢個Studio，就係咁嘅原因。」還在短片中Key木村的側面相，以打造和男神kiss的世紀一刻。不過她爆Seed指木材比她矮，所以要調校咪的高度，隨即為失言補鑊說：「對唔住，木村，好彩（佢）聽唔明廣東話啫。」
已回港的裕美接受訪問時，被問到對木村的迷戀度？她直言視對方為「老公」：「簡單係我男神啦，細個時已經幻想第二時嘅老公就係木村咁樣，不過現實係殘酷，依家就揀咗舊『叉燒』（指林作）囉，緣分呢啲嘢冇計嘅，想要靚仔就冇靚仔，我咁生得又靚，通常靚女係配個唔靚嘅。」
至於第二度在日本錄製日文歌是否有意進軍東瀛樂壇？有錢就任性的她說：「唔係啦，要進軍一個地方嘅市場就要預留起碼10年時間，我年紀都唔細啦，同埋喺香港有好多生意，仲養緊好多員工，唔可以話走就走，幾十萬去製作一首歌，唔覺得係自High，只係我最鍾意唱歌，唱日文歌仲係專長，依家搵到錢又可以自己講埋事，咪當畀自己留個紀念囉。」而她專誠全用日本班底，是覺得「魚有魚味」的道理：「譬如製作廣東話，就唔會考慮搵日本人，同埋我鍾意日本音樂人有佢哋嘅精神，就係唔用AI，要全部真材實料。」
雖然她用心製作，但不打算將歌曲派台，皆因：「日文歌喺香港都只係上到外語榜，其實上首日文歌喺香港以外攞歌曲榜NO.1，或者再製作多首廣東話啦，同埋我唱歌唔係為搵錢，講真我拍搞笑片嘅點擊全部高過晒我啲歌。」昨日她在社交網公布喜訊，指新歌推出兩日，已登上新加坡網上串流平台的J-Pop Music第4位，留言多謝樂迷支持：「實在太感動，想做就做，沒想太多，意外收穫，萬分感激。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|