人氣男團MIRROR成員Ian（陳卓賢）人氣高企，將於今年7月在在啟德體藝館舉行6場《IAN CHAN：GROWTH：LIVE 2026》演唱會，近日正積極進行宣傳工作。日前，他接受鄭裕玲訪問，自揭以前經常會亂諗嘢，甚至曾陷入低潮期試過「做傻事」。
Ian提到當年參加《全民造星》，本是抱住純粹想接觸音樂的出發點，只是入行後的落差令他無所適從，曾陷入情緒困擾，憶述：「嗰陣時好複雜，好唔適應身邊嘅環境，啲嘢好陌生，參加《全民造星》時純粹想接觸音樂，之後可以將興趣變成工作，覺得好幸運。但跟住發覺所有嘢都好陌生，我做緊嘅係咪我當初鍾意嘅嘢？我甚至有一段時間好怕唱歌，寫歌特登寫短啲兩分幾鐘，快啲唱完。」
Ian更自揭試過做傻事，表示：「大家睇到我依家都好開心，但嗰陣做過一啲『傻事』，仲要係跟住第二日要拍綜藝節目，之後要好似好開心咁。」鄭裕玲關心他的情況，問到是否容易情緒波動，lan解釋：「以前係，但依家又唔會。我成日亂諗嘢，想得太多，好方面睇係心思縝密，但反向就係諗太多影響情緒，以前經常咁，依家唔會喇。」
Ian指自己近年較以前自在：「早幾年有一、兩年時間真係depression，當刻只係覺得所有嘢唔開心、灰濛濛，嗰陣最主要係因為受合約問題困擾，最簡單例如係我爭取到一啲機會，但因為合約問題，令到我冇咗啲機會，比如當我Cast中一部電影，但嗰陣我係Co-management，公司之間會就電影版權去商討，達成唔到共識時，『咁就唔好畀佢拍囉』。」
陳卓賢坦言自己試過向公司爭取，但在合約上的條款令他無能力作出改動，最後失去角色由其他演員演出。Ian承認一度感到無助及沮喪，感慨表示：「有好大心態上嘅衝擊，以前做運動員達唔到目標，自己努力訓練，終有一日會得嘅。但做藝人唔同，嗰下落差好大，會覺得即使努力做某一樣嘢，可能未必會得到，可能機會喺你面前，可以把握時又會被攞走，嗰陣時好唔開心。」
對於自己的改變契機，Ian舉例說︰「冇話特定一件事，係一個stage，好似揸車咁，喺高速揸車無啦啦傾盆大雨，但又無啦啦嚿雲過咗然後變晴天，而我就係咁樣，回想唔到係特定邊件事，嗰段期間係not that bad，係晴朗化，越來越好。」問到Ian對演戲是否喜愛時，他直認不諱，並透露甚麼角色也想嘗試，不一定局限於偶像的框框，因為覺得可以透過電影，去經歷另一種人生。
防止自殺求助熱線：
香港撒瑪利亞防止自殺會： 2389 2222
生命熱線： 2382 0000
社會福利署： 2343 2255
撒瑪利亞會熱線(多種語言)： 2896 0000
醫管局精神健康專線： 2466 7350
明愛向晴軒： 18288
東華三院芷若園： 18281
「情緒通」熱線： 18111
賽馬會青少年情緒健康網上支援平台「Open噏」：http://www.openup.hk
本文作轉載及備份之用 來源 source: http://hk.on.cc
|
鍾意就快D Share啦！
|
|
|