尋日4月30號係姜濤27歲生日，姜糖再次將銅鑼灣變身「姜濤灣」，大量粉絲全日聚集賀男神生日。一直去到夜晚11點半，姜濤突發開live同「姜家人」傾心事，過萬人同時睇，但佢因素顏怕醜而戴住口罩。姜濤於生日會上自爆曾虛報學歷，實際上只有中一程度，並非中三畢業，引發全城討論。佢大方提起指選擇喺生日會同大家坦白，係因為知自己唔係一個好抵撐嘅人：「我以前冇聽太多批評，傷害過身邊人。26歲呢年變化好大，係由男仔變男人嘅轉捩點。多謝大家鞭策，客觀嘅批評我會聽。」
愛創作嘅姜濤曾言「用作品說話」，佢即場拋下震撼彈：「我今年暫停所有出歌計劃。」佢續坦言兩、三個月前喺的士度諗通呢個決定：「公司問我幾時出歌，我突然覺得好似例行公事。我連想講咩主題、咩曲風都諗唔到，甚至連自己鍾意嘅R&B、Jazz都冇信心話想做。喺經歷完嗰個思想掙扎之後，落車前5分鐘我就決定不如今年唔好出歌喇……我都想畀自己靜一年，畀自己個思想放鬆吓，所以我決定今日要親自公布。」姜濤再三強調呢個係一個艱難決定，希望粉絲可以相信自己，因為呢個係佢思考再三嘅決定，仲笑稱講到好似自己要結婚咁。
姜Admin稱由《蒙著嘴說愛你》開始，每首歌都係由一個想表達嘅畫面或故事出發，然而近年個創作衝動係「遞減式」下降，出完今年隻碟之後，好似咩都講晒：「我要講嘅成長、情緒、情歌，以前嘅歌都講過。既然冇嗰團火，不如唔好夾硬出。正正因為快，先要放慢腳步沉澱自己，係balance。我依家就冇要出歌嘅壓力喇，今年唔出歌唔代表我會暫停。」所以決定今年唔出歌，但會繼續製作，放慢腳步沉澱，下年一次過用album形式同大家見面。
至於今年做咩？佢笑稱要睇多啲show：「我以前有啲社恐，好少睇人表演。今年我要去吸收養分，可能喺香港唔同show見到我都唔奇。」佢仲關心haters：「你哋今年終於唔使聽到我啲歌污染耳仔喇，哈哈。」引得大批粉絲留言表示支持偶像任何決定，想佢好好休息。
本文作轉載及備份之用 來源 source: http://hk.on.cc
|
鍾意就快D Share啦！
|
|
|