丹尼斯烏達夫發揮後備殺手本色。(Getty Images)
周日(21日)凌晨世盃E組賽事，德國「後備殺手」丹尼斯烏達夫再發威，上陣後連轟2球，幫德國2比1絕殺科特迪瓦。烏達夫喺首輪後備上陣交出1入波同2助攻，今場又梅開二度做救世主！德國兩戰全勝後宣告提早出線。
德國今場控制戰局，開波12秒就有夏維斯窩利抽高，呢位箭頭10分鐘再接應甘美治長傳，頭槌頂彈地波門將耶希亞科芬拿救出。德國不斷嘗試都效果一般，穆斯亞拿鵝眉月頂熨射貼柱而出，阿歷山大柏夫洛域頭槌入波又食「詐胡」，贏晒形勢都入唔到波。
科特迪瓦喺30分鐘第1次中龍攻門就得手，恩迪奧文迪左路爆破後傳中，阿密特迪亞路門前射門被尼敦布朗閂出，基斯爾及時補射得手。德國喺39分鐘再食「詐胡」，夏維斯曾送個波入網，但穆斯亞拿犯規在先，德國隊要落後1球返更衣室。
換邊後德國演出更沉，反而科特迪瓦反擊威力大，51分鐘伊拿奧歐萊近門抽高。德國領隊拿高斯文60分鐘一口氣換3人，進攻速度加快，68分鐘兩名後備合作，烏達夫接應拿迪安阿美利傳中窩利抽入。補時4分鐘，烏達夫突破越位門前冷靜射入，助德國贏2比1。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
