男團MIRROR人氣王姜濤前晚開騷，並邀來早前曾同台合唱的炎明熹（Gigi）任嘉賓，兩人二度「強強聯手」顯示實力，搶眼度爆燈！獲Gigi尊稱為「姜總」的他，騷後受訪指收到炎明熹的親筆道歉信，不排除將來有機會合唱，但目前要先保持距離。
姜濤一連三場《LAVA LIVE TOUR 2026》世界巡唱前晚假澳門舉行頭場，16,000個座位爆滿，由台底跳出台面的他，以巡唱主題曲《LAVA》揭開序幕，一口氣連唱7首歌，唱《Every Single Time》時女舞蹈員跳辣身舞後，炎明熹（Gigi）上台掀起高潮，兩人上月3日在《CHILL CLUB》頒獎禮中近距離曖昧對唱後，Gigi再以嘉賓身份現身，她更「人到禮到」向姜濤送上兩隻糉應節，又玩搞爛Gag跟姜濤說：「你可以同佢做到朋友，咁你就會變咗『姜糉』（姜總），接唔接受呢個身份？」
被封「姜糉」狂笑
被Gigi殺個措手不及的姜濤望住抽糉狂笑說多謝，並提議：「一陣一人一個（隻糉）」，Gigi再以「總經理」稱呼他時，一度Dead Air的姜濤說：「我哋兩個傾偈真係好尷（尬），好多人好擔心我哋傾偈……不過請得你上嚟，我會帶動氣氛。」當介紹準備唱羅志祥（小豬）的歌曲《愛不單行》時，姜濤說跟Gigi曾唱過，但Gigi唱反調澄清只是各自唱過，姜濤未被「拋窒」謂：「但一拍即合。」到姜濤準備交台給Gigi 獨唱新歌《Colors in the Air》前，Gigi爆Seed大叫救命，姜濤關心問她發生何事，自言「傻傻哋」的Gigi稱因心情緊張，相當搞笑。
姜濤再出場唱畢《流浪星球》後，提及擔任偶像小豬演唱會嘉賓時，十足「迷弟」一樣意猶未盡讚小豬：「其實就算佢乜都唔做都覺得好睇！」又分享跟小豬傾電話，他又強調今年不出新歌並停工：「其實都做緊（歌），希望下年有不同風格嘅歌，國語同廣東話都有。」到每站的「盲盒情歌」環節，他跳唱了天王郭富城的《對你愛不完》，最後以《蒙着嘴說愛你》作結。
姜濤完騷後受訪，談及邀Gigi任嘉賓，他就以「唱過翻尋味」形容關係，直指Gigi「好得意」：「佢話佢唱嘅過程中冇唱到一段嘢，其實好小事，觀眾睇唔出，但佢特登手寫一封信同我Say Sorry，我未得閒覆佢，依家正式同炎小姐講唔緊要，好小事，睇得出佢好認真。」問到兩人可有機會推出合唱歌？他覺得要睇緣分，不排除合唱可能。至於今次跟她保持社交距離，除覺得應「貴精不貴多」外，還有窩心理由：「上次都有嚇親嘅，同埋今次表演唔啱呢個方式，佢叫我做『姜糉』嘅Gag有啲夾硬，但我好開心。」
不過他恨出口說可跟小豬零距離，指和偶像咀嘴是天時地利人和，覺得這吻是他及小豬舞台初吻：「佢應該唔係錫我，佢自己都嚇親，佢一掂我，我下意識望住佢，咁啱我又擰轉個頭……一開頭嚇親，後尾都開心嘅！（MIRROR演唱會發生事故後，再踏紅館舞台？）喺紅館都有行個圈，係好有標誌性嘅場地，有冇機會再踏紅館就睇緣分。」最後問到跳唱《對你愛不完》也視郭富城為師傅？他口窒窒說：「唔敢拜師，佢係我哋嘅神，小豬都係模仿郭富城前輩，我又模仿小豬，應該冇乜人想模仿我。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
