國際盛事世界盃現正舉行，除咗賽果之外，唔少靚仔球星都備受關注，當中更有唔少熟悉面孔，全因同明星撞樣，成為世界盃嘅一大彩蛋！
東北Anson Lo
有英格蘭國腳之稱嘅安東尼哥頓，預料將成為正選左翼，並將於18日出戰，顏值極高嘅佢，更因為鼻高高、青靚白淨，而被香港球迷笑指似足初出道時嘅Anson Lo，而有「東北Anson Lo」之稱。
墨西哥Sam哥
墨西哥門將奧祖亞（Guillermo Ochoa）向來被指撞樣吳鎮宇，而有「墨西哥Sam哥」稱號，雖然早前墨西哥對決南非，奧祖亞做後備冇落場，但身為吉祥物嘅佢，當然有被拍得身影，每次見到佢都依然有「Sam哥」影子。事實上就連吳鎮宇本人都曾經幽默「冒認」對方，間接認證似樣。
日本陳豪 v.s. 日本烏鴉
日本國腳長友佑都經常被指同視帝陳豪撞樣，兩人五官相似，加上深膚色、闊腮骨及笑容，被網民笑指係「失散兄弟」，呢個經典撞樣組合，每次世界盃都定必被無限Loop。不過最近日本隊又有另一個熟悉面孔，日本快翼伊東純也，被指同張耀揚年輕時期嘅經典角色「烏鴉」似到十足十，不論神情、眼神同氣質，都有「烏鴉」嘅影子！
球壇朴敘俊
韓國隊嘅曹圭成2022年世界盃一戰成名，因188cm身高加超高顏值而一夜爆紅，獲封足球界男神，更被指撞樣男神朴敘俊，收穫無數女粉絲，令人期待今次世界盃再度出戰。
耶馬撞樣TY
18歲西班牙天才球星拉明耶馬，年紀輕輕已屢獲佳績，當年更以15歲零9個月16日之齡，成為巴塞隆拿球隊史上最年輕上陣球員，即將代表西班牙出戰世界盃嘅佢，外表同有「混血樣」嘅Tyson Yoshi都有幾分相似！
動漫人物
除咗有明星相，仲有球星撞樣動漫人物，挪威射手艾寧夏蘭特（Erling Haaland）被網民一致認為似《龍珠》反派角色「魔人布歐」，不論體形、爆發力，都有「非人類級別」嘅壓迫感，至於法國前鋒基利安麥巴比，一直被指樣貌似漫畫角色忍者龜，之前佢鼻樑骨折要戴面罩上陣，即被笑指更加神似忍者龜。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
