坦承憂心淪「炮灰」
白只接受傳媒訪問時，也表示了有些無奈。「都係，如果觀眾冇乜反應嘅話，我哋好正常應該都係炮灰。我哋畀心機拍，拍得好唔好，然之後觀眾鍾唔鍾意，完全唔係成正比，所以希望觀眾會喜歡啦。」
演繹打工仔「準時收工」
電影《一個部門的誕生》講述一名市民為求解除電視台月費合約而挾持人質，從而側寫現代服務機構運作中的荒誕現象。講到cut台的內容，白只表示自己未曾有過「想cut台又cut唔到」的經驗。「我都想平反一下，我唔係做嗰隻想早收工嘅CS，係想準時收工，大部分香港人都係咁。做好本分，老細要我做嘅嘢就夠，唔好做多。（做演員都係想準時收工？）唔知喎，譬如你做演員，有陣時係覺得點解搞咁耐，到底搞緊啲乜，但係⋯⋯你有一樣嘢，你係想lam埋等嗰個過程，因為嗰陣時你完全relax，導演鬧人係唔會鬧你，你終於可以睇吓佢拍緊啲乜嘢。（食花生？）食花生，學習吓都好。」
與陳奕迅、林熙蕾同場超興奮
訪問中，白只也表示電影《不得不好死》在冰島拍攝的環節已完成，並對與陳奕迅、朱茵及林熙蕾同戲感到十分興奮。「好開心，因為有Eason，大師姐朱茵⋯⋯（有幾個女神喎）仲有林熙蕾小姐。我相信好多香港觀眾係會好開心，我自己都好開心，開心到有陣時喺片場，導演有陣時都會講：『可唔可以專心啲？』我係做阿Jer嘅朋友，所以都有同場機會，但係最正嗰個位係，我冇乜對手戲，所以咪可以企喺度睇。Eason喎，有時佢休息緊，無端端會哼一粒音，然後我哋成班演員：『嘩，天籟呀！』」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
