比利時今場發揮非常出色。(Getty Images)
周二(7日)朝早世盃16強，東道主美國賽前獲總統特朗普出面「求救」，令王牌前鋒科拿連巴洛根爭議性「放監」上陣，引起各界猛烈炮轟。不過美國今場表現差勁，最終以1比4大敗而回，近5屆4次參賽都喺16強出局，今屆3支東道主球隊亦全部畢業。
賽前焦點落喺巴洛根身上，佢上輪食紅牌本應停賽，但國際足協突然宣布對佢1場停賽緩刑，令佢可以喺今場關鍵賽事上陣。美國總統特朗普隨後公開證實，曾致電國際足協主席恩法天奴要求「重審」，緩刑結果出現後，歐洲足協、比利時足總、前國際足協主席白禮達等都發聲明炮轟呢個決定。
比利時提出上訴未獲國際足協受理，唯有落到球場靠自己，佢哋一開波就壓住美國嚟打，卡斯泰尼唔夠1分鐘就幾乎入波，佢禁區外勁射被馬特費斯飛身托出底線。比利時強攻下喺9分鐘先開紀錄，尼高拉斯拉斯堅殺入禁區後橫傳，基迪拿尼門前射入。
美國31分鐘由巴洛根禁區頂博到罰球，上場入過靚罰球嘅馬歷堤曼再處理，今次射門省中人改變方向彈入。不過美國開心咗2分鐘又落後，李安度杜沙特殺落底線傳中，基迪拿尼接應頭槌頂入。比利時之後再有杜沙特後腳妙射同盧基巴基奧頭槌失機，未能增添紀錄。
換邊後美國開始施加壓力，正當佢哋佔據上風之際，後防一次低級犯錯出事，門將馬特費斯出禁區解圍失誤，基迪拿尼從後篤甩，雲拿根第1時間射入空門。美國最後階段仍未放棄，但有心無力，比利時喺補時再由盧卡古錦上添花，大勝4比1晉級8強，下場硬撼西班牙。
免費玩game、1日狂爆5張卡！一鍵share畀朋友一齊玩：
本文作轉載及備份之用 來源 source: http://hk.on.cc
|
鍾意就快D Share啦！
|
|
|