美斯「行住踢」一樣稱霸球壇。(Getty Images)
阿根廷球王美斯以39歲高齡，喺今屆世盃創造驚人紀錄，6場賽事交出8個入波同2次助攻，近乎憑一己之力帶領阿根廷殺入4強。更加驚人嘅係，國際足協日前公開一個數據，原來美斯今屆有高達63%比賽時間處於「散步」狀態，仲有近25%時間係靜止模式，套用喺一般凡人球員應該早被鬧爆，但呢套「偷懶戰術」偏偏係美斯封神法寶！
現代足球講求體力化同高強度壓逼，「滿場飛」嘅球員深受球迷愛戴，但美斯嘅數據就打破晒球迷思路。國際足協公布美斯8強前嘅統計，佢喺場上運動狀態分布，24.7%時間係靜止「待機」、62.7%時間係「散步」、8.6%係「慢跑」、2.8%係「跑步」、只有1%時間係「高速跑動」同0.1%「衝刺」。
年齡當然係呢組數據嘅重要原因，最重要係美斯對留放嘅拿捏已經爐火純青，可以精準選擇喺有需要嘅時間先至「出力」，更關鍵嘅係，美斯「散步」嘅主要位置，係對手中場同後防之間嘅空位，佢喺呢個位置拎波後，可以直接進襲對手防線同創造機會，喺阿根廷控球時間，美斯有92%嘅運動係喺前場三區或禁區做終點。
前英格蘭國腳米卡李察士表示：「英格蘭可以跑贏阿根廷，但美斯係個天才，要盯死佢係冇可能嘅事，因為美斯從來唔回防，佢會出現喺啲唔應該出現嘅位置，突然喺合適時間開動，施展佢最上乘嘅技術，佢對空間嘅意識係冇得頂。」
前法國中堅華拉尼亦同意：「美斯嘅專長，就係喺令你困惑嘅位置散步，你需要不斷同隊友溝通，究竟係邊個盯佢？中場、中堅定係兩閘？」另一前法國中堅加拿斯就話：「就算美斯散步，作為後衞都唔想佢拎波，但當你諗住貼近佢，美斯已經贏咗，因為你身後嘅空位正正係佢創造機會嘅空間。」
免費玩game、1日狂爆5張卡！一鍵share畀朋友一齊玩：
本文作轉載及備份之用 來源 source: http://hk.on.cc
|
鍾意就快D Share啦！
|
|
|