利辛度馬天尼斯係眾矢之的。
阿根廷喺世盃決賽前捲入政治風波，多位球星喺4強淘汰英格蘭後，公開展示「福克蘭群島係屬於阿根廷」嘅橫額，引起英國政府同國民震怒。英國政府官員要求國際足協對涉事球員作出停賽處分，矛頭直指曼聯球星利辛度馬天尼斯等國腳，多位喺英超落班嘅阿根廷球員，甚至可能被取消工作證。
對於阿根廷球員贏波後嘅行為，英國商業及貿易大臣靳秉德表示：「政治應該同足球分開，依家係國際足協話事，我希望佢哋會妥善調查。」自民黨黨魁戴維更指：「所有主動去拎住、展示、宣傳呢條政治橫額嘅球員，必需要即時停賽1場，取消佢哋世盃決賽上陣資格。」
阿根廷賽後有份參與「橫額風波」嘅球員，主要係利辛度馬天尼斯、基斯甸羅美路同盧施素，干沙路蒙迪爾就係率先執起球迷掟落橫額嘅人。戴維更提出「案例」，西班牙球星洛迪卡斯簡迪同艾華路莫拉達，喺24年歐國盃奪冠慶祝期間，高呼「直布羅陀係屬於西班牙」，結果各被歐洲足協停賽1場。
效力曼聯嘅利辛度馬天尼斯係主要「持旗手」，亦成為英國國民眾矢之的，甚至連曼聯球迷都要求球會同佢提早解約，英國已故首相戴卓爾夫人嘅前顧問加特拿提出：「每個參與呢件反英醜陋事件嘅英超球員，都應該被取消英國工作簽證，英國對今次事件係零容忍。」不過，白宮世盃特別工作小組執行主任朱利安尼日前聲援，指阿根廷球員有「言論自由」，有權展示橫額，唔知FIFA點睇。
雖然引起軒然大波，不過英國《太陽報》報道，阿根廷球員已經將呢個爭議橫額帶回酒店，有意「偷運」去決賽會場。隨阿根廷國家隊打氣嘅球迷奧巴喺社交網表示：「關心呢條橫額嘅人可以放心，佢被保存得好妥當。」奧巴展示橫額嘅地點正正就喺阿根廷大軍嘅酒店內。
據報奧巴係呢條橫額嘅製作人，佢自爆喺4強偷運「違禁品」入場經過：「我將佢摺到有咁細得咁細，然後收埋喺底褲入面，成功逃過安檢。當我見到干沙路蒙迪爾，就將條橫額掟畀佢，佢就交畀盧施素，見到盧施素同隊友一齊展示，我開心到難以形容，呢件事對阿根廷人意義重大。」
免費玩game、1日狂爆11張卡！一鍵share畀朋友一齊玩：
本文作轉載及備份之用 來源 source: http://hk.on.cc
|
鍾意就快D Share啦！
|
|
|