阿諾特有復甦迹象。
皇家馬德里今季喺摩連奴回巢下展現新氣象，周三(29日)凌晨閉門熱身賽，以4比1大炒西乙球會雷加利斯，上季加盟後表現低迷嘅阿歷山大阿諾特，畀「寸王」調教後有翻生迹象，今場個人製造3個入波。皇馬仍然想喺轉會市場大展拳腳，不過收購洛迪卡斯簡迪嘅計劃，就遇上報復式截劫。
皇馬嘅世盃球星陸續歸隊，今場有費達歷高華維迪回歸領軍，杜費斯、魯迪格、安迪歷等亦有到場觀戰，不過最搶鏡係今個暑假練到足嘅英格蘭右閘阿諾特。皇馬早段由華維迪先開紀錄後，阿諾特就用招牌長傳助攻干沙路加西亞入波；下半場阿諾特遠射被撲出，馬斯坦奧奴執雞補中；皇馬第4球亦係靠阿諾特急勁傳中逼到對手擺烏龍。
阿諾特上季由利物浦加盟皇馬後，表現浮浮沉沉，今季丹尼爾卡華積離隊，阿諾特被睇好可以坐穩正選，但新簽嘅荷蘭國腳杜費斯有力威脅佢嘅位置。皇馬名宿馬些路賽後表示：「阿諾特個長傳睇到我企起身拍手，佢嘅傳送係藝術，我諗球迷今季可以享受阿諾特嘅演出。」
皇馬夏天大換血，依家正全力完成恩迪奧文迪同洛迪嘅交易，不過收購曼城中場洛迪嘅計劃就面臨考驗，據報巴黎聖日耳門(PSG)同巴塞隆拿都有意截劫。法國傳媒指PSG喺收購恩迪奧文迪被截胡後，打算「報復式」搶番洛迪；至於巴塞隆拿喺法蘭基迪莊重傷後，亦想引入頂級中場代替，洛迪就成為頭號目標。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|