現年41歲的傅寶誼推出新歌即被寸「更年期仲扮少女」未算傷，皆因24年星途一直活在挫敗中，曾以「慣性老屈」為生存秘笈，結果屈出情緒病也懵然不知；現時心如明鏡再回首往事，她感激未得舊隊友施援手時，最夠「雷」的楊千嬅願意挺身而出。面對網民繼續抨擊，她拋下一句：「你若經我苦，未必有我善。」網民都為之感動及表示支持。
前女子組合Cookies成員傅寶誼（前名傅穎，Theresa）相隔5年再推出新歌《成年禮》，日前接受專訪時，她指歌曲並非單純講十八年華，而是象徵人生下半場正式開始。儘管新曲正能量滿滿，但仍遭網民無情「柴台」，她豁達表示：「我知呀，啲網民話我更年期都到啦，仲唱成人禮，我咪同佢講更年期都啱聽呢首歌㗎！」
今次推出新歌，令其經典「走音作」《花吃了這女孩》再度在網上翻Hit，Theresa亦勇於面對黑歷史，指4年前早想克服此「魔曲」，曾在內地騷再作出挑戰，可惜未能雪恥：「都係『瀨』咗嘢。」她否認《花》曲是其「宿敵」，強調在錄音室及私下練歌時零走音，認為一唱Live就「炒車」全是心理壓力影響。問到心理壓力何來？她認為與不斷「食死貓」有關，並侃侃而談其「老屈事件簿」中的冰山一角，稱前唱片公司經過人事變動後，當面明言要「放棄」她，但可放她一條生路，她憶述：「佢哋話要做其他歌手，嗰年半合約可以無條件解除，嗰時仲覺得公司深明大義，點知第二日我就上咗頭條新聞，話解約係因為我唔肯做訪問，激嬲咗無綫，得罪無綫係事實，但我冇收到任何訪問通告。」
大鑊嘢唔講得住
問到疑遭唱片公司「老屈」是否最大打擊？她竟說：「嗰啲係小事，有一單真係好大鑊，但依家唔可以講出嚟，有一日我Pass Away（死咗）先講（同拍拖有關？）都算係，但嗰件事嘅打擊大到顛覆咗黑與白，影響到人嘅三觀，發覺世界係冇公道。（點解唔即時反擊？）劈炮唔係咁容易，有合約在身，可能要孭一筆巨款，嗰時我又冇咁多錢，生活要繼續嘅。」
Theresa曾因接二連三的委屈事而決定退出娛圈，只是機緣巧合下，轉戰內地發展，可是類似事件再重演。有次她跟內地網紅拍攝綜藝節目，因辯論比賽落敗，其隊長竟然兩度將責任推卸在她身上，對方跟主持人說「是寶誼的選擇」，事後她雖然接受隊長的道歉，可是在休息室足足爆喊了一小時，她憶述：「其實係全組人嘅決定，我喊唔係嬲佢，係發自己脾氣，點解我由細到大都唔會為自己發聲。」
問到她狂食死貓可有屈到病？她承認曾經病過，更接近危險邊緣：「嗰陣係唔覺得自己有病，但有出現嘔、手震，眼淚唔受控制，我當時選擇唔講出嚟，係因為嗰陣唔興講有情緒病，同埋怕畀人話我博宣傳。」她坦言至今從未求醫，只是成功靠閱讀及信佛療愈自己，加上人到40歲時突然開竅，她又趁機宣傳新歌：「冇以前嘅經歷，點會有《成年禮》？有冇聽過『心不苦，道不生，心不苦，志不在。』」
有苦自己知
Theresa入行24年，走過人生高山低谷，問到最絕望時可曾有人伸出援手？她率直表示：「梗係冇啦，有邊個可以幫到我。（Cookies隊友同圈中朋友都有啩？）有啲嘅，活到呢個年紀就知朋友好可貴，但真係有事時，諗吓真正嘅朋友有幾多個呢？」受盡人情冷暖的她，鄭重感激楊千嬅曾雪中送炭：「當年如果唔係千嬅開口同唱片公司講，我連出碟嘅機會都冇。」
此外，近日接受不同訪問時，Theresa談及多年來的恩怨是非，引來網民冷言冷語，她前日在社交網發長文，開首便表示：「被問及舊事，與其支吾以對，我選擇坦蕩回應。保持沉默，只是加害者希望的，也是旁觀者覺得妥當的，卻從來無人真正讀懂過這些傷。」所謂針唔拮到肉唔知痛，Theresa最後拋出一番話：「知道『未經他人苦，莫勸他人善』的下一句是甚麼嗎？你若經我苦，未必有我善。」感動不少網民。
本文作轉載及備份之用 來源 source: http://hk.on.cc
|
鍾意就快D Share啦！
|
|
|