談到網民質疑演出海報揭示她是「內定三甲」，尤淑情笑言：「咁如果真係咁講嘅話都唔拒嘅，哈哈！如果佢哋咁諗……希望係邊個都希望係㗎嘛，係咪？其實我哋都要好好咁準備。其實我都冇諗三甲或者七強啲嘢，因為我本身好注重自己每round嘅歌，我比較執著我嘅歌一定要唱好。所以呢一次七強都係一樣我嘅心態，因為我哋諗係冇用嘅，好多嘢都會有變化，最重要就係自己嘅歌要唱好。」
提到吳亦偉發音未夠標準卻依然獲得評審高分、被指獲手下留情，尤淑情亦表達了看法：「係嘅，有時覺得『吓？點解咁高分嘅？』我哋都唱好辛苦喎，又唔可以出差錯咁囉。都會有嘅，會覺得『點解你咁樣嘅字？』不過我覺得呢啲有時……佢都有佢表現嘅魅力喺裡面，咁又無可否認嘅。佢有佢自己本身獨特嘅風格，係評審好鍾意嘅。所以呢啲係睇評審嘅睇法同客觀睇法，我哋做唔到咩決定啦。」
對於會否擔心自己未來的選曲會受影響或遭受不公，尤淑情則堅定表示會繼續專注個人風格：「我就比較執著於我自己，我一定要做返我自己歌喎。因為我係唱畀欣賞我嘅歌嘅人，我要欣賞我自己，我唱出來自然有人欣賞我。唔係講每個人都會欣賞每一樣藝術品，我係一個藝術，咁鍾意我嘅人咪鍾意聽囉。唔鍾意嘅話，就算我哋做得幾好，都係唔鍾意，所以我都係要堅持做返我自己，我一定會搵到一班鍾意聽我歌嘅人。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|