周嘉洛、朱敏瀚（朱仔）及吳偉豪同是無綫近年力捧的新生代一線小生，3 人憑着處境劇《愛．回家之開心速遞》及多套重頭劇上位，先後各自奪得無綫「最佳男配角」及「飛躍進步男藝員」，捱了多年由跑龍套做到男主角。他們亦因合作而變成死黨，特別是嘉洛及朱仔，多年前合作拍《痞子殿下》成為好兄弟，嘉洛更因對方而迷上健身，齊齊為健康而戒掉飲酒的壞習慣。他們視無聊的相處日常為男人的浪漫，嘉洛更笑言：「如果佢係我條女就好喇！」
無綫上位小生朱敏瀚與周嘉洛同是無綫藝員訓練班出身，人生第一份工作同樣是效力無綫，雖然入行背景相似，卻一直沒有來往，直至拍攝古裝劇《痞子殿下》日對夜對，才成為「出生入死」的老友。嘉洛談到最初對朱仔的印象，認為跟對方無法做朋友，他笑說：「最初知佢係公司最Top嘅靚仔、Cool cool哋，本身覺得未必會想同佢做朋友，但圍讀第一日就打破咗，佢笑容好友善、好甜，同我幻想嘅好唔同。」朱仔則說：「之前覺得佢好有Talent，又升得咁快，但最大嘅Suprise係拍一場監獄戲， 佢一Take過講咗幾頁紙，大家拍晒手掌，嗰場戲話畀我聽佢真係好勁。」
《痞》劇可說是他們最辛苦的一部劇集，日接夜開工，亦讓他們第一次嘗到在公司錄影廠宿一宵的滋味，嘉洛說：「嗰陣一齊瞓廠，佢踩得最甘，試過60個鐘冇瞓覺！」朱仔說：「因為要黐頭套，得幾個鐘情願喺公司瞓，兩、三日先返屋企沖個涼。大家輪住踩，個個都瀨晒嘢，永遠有人慘過你，成班人好辛苦但又好開心。嗰陣我、嘉洛、陳瀅、JW、曹永廉、張頴康等叫做『九星連珠』，大家開工帶埋酒去飲，好多開心回憶。」嘉洛說：「嗰種開心係覆蓋咗辛苦， 腎上腺素上升，就算唔夠瞓都好享受呢段時間，已經冇命，仲攞埋個肝出嚟享受。聽前輩講得多，但自己係第一次感受到。」朱仔亦難忘彼此齊上齊落，等埋一齊放工食早餐，隨即又繼續開工的日子。
齊齊戒酒保健康
嘉洛與朱仔拍攝《痞》劇後再合作劇集《痞子無間道》、節目《約埋班Friend 去旅行》及《試真D》等，有說不完的話題，工作、人事、戲劇、健身無所不談， 嘉洛大爆朱仔靚仔以外，鮮為人知的戇直一面：「我哋傾好多無聊嘢，其實佢私底下好戇居，有時做Gym操操吓，佢會無啦啦喺度大嗌，幾搞笑，其實意義不明、冇乜重點，就係戇居，有少少男人嘅浪漫。」朱仔則說：「呢方面唔係好多人睇到，得張振朗、Leo（關曜儁）見過，幾開心我哋4個咁Friend。最初識Leo係拍《反黑路人甲》要除衫，知佢係健身教練，就問佢可唔可以幫我，嘉洛同Leo係同期訓練班，咁就將4個人Bonding咗，老實講人生最Friend就係佢哋。」嘉洛附和：「我都係。」
朱仔因拍攝《反黑路人甲》及《拳王》而迷上健身，這個興趣亦感染了嘉洛，兩人現在日日見面，日操夜操，除了愈操愈大隻外，亦齊齊為健康人生而戒酒，嘉洛說：「健身目標真係為咗健康，以前會飲酒，依家就Cut咗，自律搞好自己先，依家成熟咗，轉咗飲水。」朱仔說：「依家開工狀態好啲，飲完酒始終會影響第二日嘅狀態，盡量避得就避。」
三十而立的嘉洛，自言年紀大開始思考人生，會與朱仔分享內心感受，亦視對方為學習對象：「大家睇法好接近，佢有啲好嘅嘢，自己想跟住改變。見佢同振朗嘅友誼好似親兄弟咁出雙入對，做咩都一齊，我就單身寡佬咁耐，幾羨慕呢段友誼。」兩人去過不少地方旅行，相識多年卻未試過嗌交，嘉洛笑說：「佢對我特別包容，當好細佬咁，就算各執己見，都肯聽對方意見，好舒服。如果佢係我條女就好喇，哈哈！」
二人同時備受公司力捧，但並不存在同行如敵國，反而覺得大家的演出各有獨特之處。問到下個目標是否劍指「視帝」？嘉洛坦言：「比起攞視帝，更加想同佢哋拍一套好難忘、有意義、有價值、有回憶嘅劇集。」朱仔亦認同：「如果一齊拍加埋出埠就好，過程好重要，而唔係獎項。我哋加埋振朗、Leo可以拍《醉爆伴郎團》，好耐冇劇集講友情，我哋唔使演朋友，真係朋友去拍係差好遠。」他同樣表示「視帝」並不是終極目標，但樂見有一日大家同台競逐獎項，要得到觀眾認同，而不是排隊等攞獎，屆時獎項花落誰家都會替對方高興。
場地：Hexagon Dynamic
本文作轉載及備份之用 來源 source: http://hk.on.cc
|
鍾意就快D Share啦！
|
|
|