歌手Tyson Yoshi近日接受網上節目訪問，談到他被網民形容為「訪談型歌手」，他對此豁達表示冇所謂：「有啲音樂人覺得你一定要聚焦我嘅音樂，我冇所謂，可能10個人有9個只係睇我嘅訪問，那怕有一個會按入去聽我啲歌，咁我都OK。」
回顧出道點，他稱當年一邊寫歌，一邊在室內設計公司當上班族，發現網上收音樂版稅跟他的工資相若，而且每月間中到中環酒吧唱歌也有酬勞，加起來差不多近10萬元，他笑言：「又話做音樂會乞食，原來自己做係OK。」他指後來有一次要開騷，跟老闆請假時，發現已沒有大假，被對方點醒：「佢話不如你辭職啦，其實你咁後生，你咪試吓音樂囉，你唔得嘅話，你都可以返嚟畫圖。」問到成名的煩惱，他稱以前會覺得有，但時間久了會覺得做人要有取捨：「份糧包埋架嘛，呢啲嘢總會過，過咗之後，你可能又會好掛住呢，你依家所謂嘅煩惱可能係你之後好懷念嘅嘢，所有嘢都盡量去享受。」
早前Tyson在佛山出席活動，並大受歡迎，他自爆以前還未成名前曾在內地唱歌：「我喺廣州嘅一間比較hip hop嘅club，喺張枱上面唱歌，仲畀人噓我，因為佢哋想聽當日主角嘅表演，我只係之前負責暖場。不過呢啲係好事，你冇呢啲邊有動力，你經歷過之後，你再畀人鬧，你會覺得仲羞辱嘅我都經歷過啦。」另外，Tyson透露將推出新歌《Back Home》，歌曲關於「唔Do」:「前排唔係好想做嘢，覺得好煩，唔想做Tyson Yoshi，因為屋企發生咗啲事，嗰排就好灰，但好處係令我發現，都一路衝咗咁耐，日日都喺度做Tyson Yoshi，係咪要留番小小時間畀屋企人同自己，發現原來我冇咗個平衡好耐，咁就有呢個靈感寫咗首歌，咁就做多陣囉。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|