2014年1月8日 星期三

[FACE 346 專訪] 會來臨的 車婉婉 車婉婉,MF,




面對面

會來臨的 車婉婉

這是一個老生常談的話題「信者得救」,大家都愛掛在嘴邊:只要有信念,好運就會降臨。

只是說來容易,做到很難:當低潮時,又有幾個人還能保持信念?

尤其是,這番話出自一個 39歲生日前夕剛嫁得出、相隔 11年如願以償再出專輯、交遊廣闊一呼百應連許志安、鄭秀文都專程飛去布吉陪嫁的車婉婉口中。

上週二( 28日)剛滿 39歲,最近行運行到落腳趾尾的車婉婉說,自己來自上世紀, 92年贏得新秀冠軍、首本名曲〈會過去的〉出產自 00年, 03年打後人生就開始走下坡:喉嚨生繭不能再唱、母親惹官非又再病逝,已經跌落屎氹再被仔飛猶如兜頭淋多篤屎、然後進入長到以為無盡頭的感情 dry爆期……當已跌落屎氹,憑甚麼繼續信下去?

「我自細鍾意玩個遊戲,撲傻瓜,當自私同妒忌呢兩個魔鬼嚟到時,我會撲走佢;當負能量侵襲時,我又會撲走佢;就算最低潮嘅時候,我都唔會懷疑自己。如果唔相信會過去的,永遠都唔會過去。」

所以說,人人都識唱〈會過去的〉,是不是人人都知道,他的潛台詞其實是要相信該來的一定會來?

我嫁得出

剛滿 39歲的車婉婉,除了首本名曲、與許志安合唱的〈會過去的〉,最出名的還有喜歡研究星座,是城中神婆。神婆這天說,從來沒試過為自己起壇占星算塔羅,倒是在最低迷的時候去找相士算過命。嫁得出這件事,最吐氣揚眉的是打爛幾個「大師」齋砵,因為個個都批死她一世嫁唔出。

人梗係喺最迷失嘅時候走去睇相啦,唔通周手都係貨走去問咩?我記得係猴年,個個都話我猴年唔嫁就一世都嫁唔出時,我又已經 dry咗咁多年,你話會唔會有影響?

我唔係有拖拍或者嫁得出,𠵱家至喺度講埋啲風涼話,就算係 low times,我都從來冇懷疑過自己。每個人都有磁場、每個人都可以自己創造環境,當你相信愛,唔信愛嘅人就自然會從你身邊彈開,呢啲就叫物以類聚。每個人都試過情場失意、死因未明、最低潮時再俾仔飛。喂,我都跌咗落屎氹啦,你使唔使再兜頭淋多篤屎落嚟呀?就算係咁,都唔可以永遠帶住啲包袱同苦澀,唔係會過去嘅嘢永遠都唔會過到。

我同 hubby(拍拖三年、上月尾剛在布吉成婚的中澳混血丈夫 Johnathon)係朋友介紹認識,我係木獨怪、被動豬,從來都係人追我、從來都係等人追。但係第一眼見到 hubby,感覺好強。你知我 dry咗好多年,好耐冇試過啲 butterflies飛上嚟,仲要係又藍又綠成竇咁飛……佢畀我嘅感覺,乾淨、坦白、簡單。我冇界定係唔係做呢行少遇到呢種人,根本呢個社會,我冇遇過一個咁乾淨嘅靈魂。我哋第一次拍拖係去南灣嘅沙灘,佢帶我第一次走落去女人街嘅橫巷食土耳其菜。當眾喺露天花灑沖身、走喺太古廣場又攬又錫,呢啲嘢我做咗三十幾年人都未做過……第一下,無疑開心,但更多恐懼:死啦,會唔會俾人影㗎?我同佢第時會點㗎?……呢個人強就強在改變咗我好多睇法,改變咗車婉婉嘅戀愛觀、點對另一半、仲有點睇人哋目光。你影咪影囉,我介意你點睇我,你賠唔賠得番畀我嗰一刻嘅快樂先?係唔係佢?邊個知邊有得計啫?你唔試,就梗係唔會知啦!

我仲想唱

上月 28日,是車婉婉的 39歲生日,兼新歌 MV〈談笑風生〉的發布會,距離她上次出碟已經十三年。十三年前,車婉婉開始拍《皆大歡喜》、開始加入商業一台主持節目講星座、加上唱片市道低迷……所有跡象顯示,不做歌手是大勢所趨個人選擇,其實不然,她是想唱但不能唱。

03年開始,我嘅人生急轉直下諸事不順。我唔係嗰啲會向朋友傾訴嘅人,唔會喊住話唔開心、我失戀,因為我唔想帶畀人負能量,更加覺得失敗係自己與人無關,屈嚇屈嚇喉嚨就開始生繭。

又會咁啱,電台份工一打就係十年,把聲長期 over use冇得唞,連醫生都話割咗又會生番,無謂。

以前我唯一發洩方法係唱歌,唔開心時落 K做咪霸,唱完一晚就舒服曬。嗰幾年連呢個 outlet都冇埋,落 K就係坐埋一邊飲嘢……結果生嘢、冇得唞、唱唔到冇得發洩就再嚴重啲,變咗一個惡性巡環。直到有一日,徹底變沙,呢把我曾經引以為豪嘅聲線、呢個我呢世人最相信嘅樂器已經用到爛,我冇辦法再表演。

一切源於前年許志安嘅《 On and On演唱會 part2》,佢幫我安排曬所有嘢,請我上台同佢合唱〈會過去的〉。人哋可能覺得好簡單,連當時嘅男朋友、𠵱家嘅 hubby都話,鍾意咪去唱囉,有咩好驚,冇人知我連 K都幾年唔敢唱,突然間有日要由台下升起到紅館正中央要衝破幾多心理障礙。有咗第一次,就有第二次做 Wyman(黃偉文)演唱會嘉賓,然後就有唱片公司搵我合作,開始有第一首歌,再同林夕偈完一輪,開始有咗第一首詞……

相隔 11年再出新歌、新碟,上週二( 28日)〈談笑風生〉 MV首播,亦是車婉婉 39歲生日兼婚後第一次見記者。

39歲生日前夕,車婉婉公布去年尾( 12月 8日)與中澳混血男友 Johnathon在泰國布吉成婚,求婚成功的許志安、鄭秀文是當天見證的少數圈中人之一。

02年拍完《皆大歡喜》離開電視台和樂壇,加入商台講星座:「一切好似好理所當然咁,其實係我把聲生嘢唱唔到。」《蘋果日報》圖片

生得高大腳又長,車婉婉話從小就想做戲、唱歌或者做 model, 92年參加新秀奪得冠軍簽約華星:「結果歌手、演員同 model,我樣樣做齊。」圖片

2000年推出與許志安合唱〈會過去的〉大 hit, 11年許志安演唱會上二人重演經典:「我有七年冇唱歌,嗰次應承安仔,感覺似斷頭台。」

我好想自己好似李嘉欣咁靚,但係我每朝都同自己講:「你就係咁醜、一世都冇可能變李嘉欣」!於事無補,不如去接受自己好過。嗰啲 low times人人都會經歷,但一個人永遠記住啲「 why me!」嘅 moments,除咗仇恨仲有咩呢?我成日想像若果我係上帝,望住班小朋友,呢個話:「我最鍾意唱歌、我一定出到碟㗎!」嗰個話:「唓……呢啲好嘢實冇我份喇!」你話上帝會畀個機會邊個?所以要信自己,唔信,每一樣嘢都唔會發生。信咗,門就自然會打開,要嚟嘅就會嚟。

我冇右手

上月 8日在布吉與 Johnathon成婚,距今還不到一個月。突然多了一個 hubby感覺當然新鮮,車婉婉說,更「 odd」的是,突然多了一個「 Dad」。(車婉婉與一哥一弟從小被母親一人撫養成人,都市傳聞已去世的「粵語片男星兼無綫甘草張英才是生父,不過當事人從來沒有正面回應。)叫老爺做「 Dad」有幾 odd?你不是從小沒見過父親、沒在家裏提過父親的人,那種「 odd」,你不會懂。

我做咗三十幾年人,從來冇遇過一個 father figure,對 father figure冇經驗冇感覺,突然間有日,老公個爸爸叫我嗌佢「 Dad」,真係要幾奇有幾奇。

由細到大,我同阿哥、細佬出於懂事、出於孝順,從來唔會同媽咪提呢個人。由細到大,我同阿哥、細佬亦唔會覺得冇爹哋件事有啲缺失。你明唔明,人哋父母健全,等於一出世就齊兩隻手,佢覺得兩隻手好用啲,但係我哋一出世就只得左手,少咗隻右手。我冇體會過有右手嘅好處,重點係,我嘅左手可以做到所有嘢,仲要做得好好添,咁我仲點解恨要有番隻右手呢?

媽咪走咗 7年,我每日都掛住佢、每日都會想起佢。佢又靚又叻對朋友又好,係嗰啲自己唔食都要畀人食嘅人,佢成日話唔好怕蝕底、有多才會有得蝕底,付出都係一種 blessing……媽咪唔喺度,但係佢嘅影響喺度,我好似佢,哥哥同細佬持家、教育下一代,都用佢嗰一套。人幾時出世、幾時離世並冇得揀,但係點樣面對可以揀。送媽咪走呢件事好傑、好痛苦,但係每個 good times、 bad times我哋選擇用咩智慧面對有得揀。上一個十年,我經歷過人生最傑;下一個十年,我想過得好,為自己、為媽咪。

07年母親肝病去世,車婉婉繼承並開始打理母親留下的車氏粵菜:「我乜都識做,但係有廚師唔到我做,𠵱家喺屋企我會同 hubby爭住煮。」

出道 21年交遊廣闊,車婉婉圈中朋友多男友亦多,歌神陳奕迅和影帝謝霆鋒都曾經和她傳緋聞。

《忽然 1周》圖片

觀星•望月•看雲背後

有關星座,車婉婉大大聲話:「你一定要寫落嚟,我唔係迷信、我唔係神婆,星座係統計學,冇人會話啲睇歷史書嘅人迷信㗎嘛!通過統計學,我學識改善自己、體諒別人,每種知識都係力量,睇你點用。」

有關故人,車婉婉真的迷信靈魂就藏在雲背後:「你唔好唔信呀,人係咁叻乜都知,就一早升咗天啦!我覺得媽咪就喺雲後面,一直喺度睇住我。唔止結婚嗰日,每日都係,所以我要過好每一日。」

信念,其實並非大家口中易講難做,只要願意相信,就好。



鍾意就快D Share啦!
Related Posts Plugin for WordPress, Blogger...