陳法拉原本和《衝上 2》原班人馬一樣，有得留低拍電影版，但早前因得罪吳鎮宇，同時又揀劇本得罪埋高層梁家樹，結果是唯一被 out出局的演員。
娛樂喧
得罪 Sam哥冇運行 陳法拉《衝上》電影版被飛
去年播出的《衝上雲霄 2》，有 Sam哥（吳鎮宇）及 Cool魔（ Chilam）壓陣，大結局高見 41點。食髓知味，大台隨即宣布拍電影版，但過了半年卻只聞樓梯響。
踏入馬年，《衝上 2》監製梁家樹（ Tommy）將轉投邵氏電影部，日前他密斟陳木勝執導拍《衝上》電影版。為加強陣容，除 Cool魔及 Sam哥外，電影版中更會加入古天樂做型佬機師。
男主角敲定，但據知吳鎮宇講明今次不會再和戲屎法拉合作，實行有佢冇我，最後法拉被踢出局，改由宅男女神林志玲坐正。
Cool魔和 Sam哥在去年「台慶頒獎禮」大熱倒灶，被玩唔順氣，對由當時仍在 TVB的梁家樹負責的《衝上雲霄》電影版，二人口徑一致話冇期唔恨拍，實行你急我唔急。
一億成本五月開拍
當個個以為電影版凍過水，誰知柳暗花明。本刊收到消息，四月將轉職邵氏電影部的梁家樹，日前已落實將於五月與寰亞電影合作拍《衝上》電影版。《衝》片更會搵擅長拍動作片的陳木勝執導，並會加入古天樂加強陣容，以一億成本打造《掃毒》式的《衝上》電影版。
扭擰揀劇本
至於女主角，梁家樹早前曾私下搵法拉傾，但據知有人最初嫌劇本男角主導，自己角色冇發揮，因此一直未回覆。知情人透露：「法拉最初唔知寰亞會同邵氏合資，驚好似上次套《 Laughing Gor》咁，係啲低成本嘅戲，又驚多男人戲，搞到自己冇發揮，所以叫 Tommy先俾劇本佢睇咗先。人哋幕後班底都未搵齊，邊咁快有劇本呢？」
法拉扭擰揀劇本，梁家樹本已㷫上心頭，加上和法拉本有積怨的吳鎮宇，講明不會再與她合作，最終法拉被飛出局。知情人續說：「其實拍電視版嗰陣，鎮宇唔止一次投訴法拉遲到。去墾丁嗰幾日，法拉仲日日遲成粒幾鐘，鎮宇嬲到爆粗，話法拉冇演員操守。佢又嫌對方戲屎，講明若再由她任女主角就唔會拍。」早前，鎮宇更開到口踩法拉演技未夠班，「佢要放鬆囉，唔好淨係睇自己效果，因為佢點做都永遠比唔上我同 Chilam。」據知，原本和法拉關係冇咁惡劣的 Chilam，本希望可以原班人馬開戲，但早前他找法拉任 MV嘉賓時，對方講明唔做訪問，亦令主人家 Chilam左右做人難。最後梁家樹撲槌，起用他欽點的林志玲及寰亞的高圓圓頂上。
林志玲恨拍
電影五月才開拍，記者致電東亞發言人梁小姐，她表示旗下公司就合作在傾談當中。至於林志玲經理人則說：「我們知道此劇在香港火紅，如有機會都想傾談一下。（做女主角？）有興趣但要再傾。」
對於法拉被飛出電影版， Chilam說：「咁梗係想原班人馬，不過最後個卡士係點唔到我哋決定，乜都係公司話我知㗎咋！我都好期待同古仔合作，等公司安排啦。」對於吳鎮宇因不滿陳法拉而飛起法拉一事，鎮宇正在內地拍戲，由經理人 Helen代為回應：「其實鎮宇喺拍《衝 2》時，冇同我投訴過任何一人，所以我都唔知佢係咪同其他人唔啱。不過如果拍電影版，我諗鎮宇都會度到期嘅！」
飛機《掃毒》版
《衝上 2》高收，大台原本一早打算開電影版，但因台慶頒獎禮分獎唔勻， Chilam分得豬肉獎，吳鎮宇更得個吉，兩大男角詐曬型，電影版幾乎胎死腹中，最後得監製梁家樹斟掂邵氏泵水，同時寰亞老闆林建嶽亦有興趣投資。有大老細支持，水頭充足，結果山寨戲忽然變大片。電影版除了搵金牌導演陳木勝執導外，古天樂將會扮型佬機師，和吳鎮宇、 Chilam鬥搶戲。另外，林志玲和高圓圓則做空姐，與三大型男有感情戲。據知，電影版劇情會參考電影《掃毒》情節，講述三個男主角在飛往外地途中，遇到罪犯而身陷險境。
|
鍾意就快D Share啦！
|
|
|
