熱爆娛樂: [忽然1周 968] 何超儀去盡啲！超儀,何超儀,MW,

2014年2月14日星期五

水牀入屋

何超儀演嘅風俗娘太緬懷以往做紅牌阿姑嘅歲月，連屋企張牀都係時鐘酒店水牀，問你怕未！

十年前，媽咪姐見何家千金何超儀喺《豪情》演趙啷啷，大騷口技，真係睇到嘩嘩聲！吖，估唔到依家佢再拍《豪情 3D》，仲夠膽死為部戲增肥 15磅，演一個由香港去日本發展嘅過氣「小姐」兼風俗娘，即係會幫埋人沖涼、按摩嘅性工作者。

嘩，一聽就知又係挑戰底線之作。何超儀呢次除咗要扮日本人講廣東話，講乜都加「乜乜 san，係嘅！」再苦練自 high表情。講真，咁出位，確係何千金先做到，仲要多得老公仔陳子聰大方無詐型。嗯，超儀近排接親啲 job，唔係做雞就係被姦，睇嚟佢想攞獎嘅決心好大喎！

導演李公樂坐上阿澤身示範俾女優睇，點樣搞㷫阿澤，何超儀負責拍手做觀眾。何千金話，嚟真嗰時，佢見住全裸女優，尷尬到暈。

自 high最難

有場戲講何超儀睇意中人阿澤成名後嘅 AV片，睇到好鬼 high，咁啱阿澤又打電話嚟，令佢自 high到瞇曬眼。超儀話演呢場戲無動作輔助，純靠表情，仲難過當年演「趙啷啷」呀！

03年《豪情》

打造肥中女

何千金初見阿澤就係以呢個九唔搭八烏歪 look出現，肚凸凸，個妝溶曬，靚到呢！

何超儀呢次喺《豪情 3D》嘅使命，係幫港男杜汶澤做日文翻譯，勇闖日本 AV界！何千金要增肥扮頹廢，但杜汶澤就要狂操減磅，練到筋肉人咁款大戰日本妹，為國增光。媽咪姐仲收到風，佢哋最終情定 AV界，大團圓結局，少少鹹多多 sweet㗎！

阿澤為新戲，爆肌爆出癮，拍完都仲 keep住做 gym節食，依家仍然手瓜起𦟌呀。

阿澤喺日本拍戲嗰時，同班 AV女優玩得好放，得閒就放啲搞笑相上網。好彩田蕊妮大方得體唔 mind啫！

鍾意就快D Share啦！