2014年2月27日 星期四

[壹週刊 1251] 小鳳姐開騷 rap 鵬哥搞爛 gag M1,




同你吟一吟

小鳳姐開騷 rap 鵬哥搞爛 gag

八年冇開演唱會嘅徐小鳳,再踩紅館嘅八場《走過順逆流,依然金光燦爛徐小鳳 2014演唱會》上星期三(二月十九日)開鑼。

鵬哥扮 A貨徐小鳳,仲要露腰凸豬腩肉,搞到正版小鳳姐笑到彎曬腰。

六十五歲小鳳姐仲好唱得,更順應潮流製作 rap歌《徐想曲》,現場演繹冇甩嘴冇甩歌詞,不過當唱《激光中》、《唱這歌》、《獨自去偷歡》等快歌,佢就齋唱唔跳,只係左右兩邊擺,鬱動指數叫做多過黎明。

跟風 rap,小鳳姐仲有留意八卦新聞,首場嘉賓請嚟 Sammi鄭秀文,兩代天後同台合唱後,小鳳姐即場除低手上兩隻金戒指俾 Sammi:「呢一隻幫你戴,祝願你永遠幸福愉快,另一隻,請你轉送俾佢。」呢個「佢」,明顯講緊許志安,小鳳姐提早做人情,搞到 Sammi好尷尬。

不過最精彩,都係鵬哥盧海鵬化身凸腩「大鳳姐」,同小鳳姐一齊著住波波裙上台,鵬哥仲話原本諗住去買胸圍,好在冇買,因為條裙窄,戴咗都塞唔入。講嚇有味爛 gag娛賓,好過盧海鵬試咪。

專登著對黑白波點鞋嘅 Sammi做首場嘉賓,獲小鳳姐提早做人情送金戒指, Sammi亦禮尚往來,話自己條腰唔及小鳳姐咁幼。

經典 look除咗波波裙,仲有魚尾裙,不過好睇唔好著,裙腳會經常不受控自動反起,要工作人員上台幫手反番落嚟。

小鳳姐唔只跟潮流 rap,仲識用平板電腦,響握手時間同歌迷影合照。



鍾意就快D Share啦!
Related Posts Plugin for WordPress, Blogger...