熱爆娛樂: [壹週刊 1251] 豬籠入水　笑住收錢　王祖藍搣 80萬玩潮車祖藍,王祖藍,M1,

2014年2月27日星期四

[壹週刊 1251] 豬籠入水　笑住收錢　王祖藍搣 80萬玩潮車祖藍,王祖藍,M1,

王祖藍近年積極賺錢換樓換車，無非為迎娶拍拖五年的女友李亞男做準備。

探熱針

豬籠入水　笑住收錢　王祖藍搣 80萬玩潮車

矮仔多計。得五呎三吋高，靠食腦的王祖藍最近在內地節目扮 G.E.M，網上點擊率過百萬，扮嘢扮到有市有價，「入場費」已跳升至 35萬人仔一集。

搵到錢，唔怕 fing！王祖藍買千萬豪宅再掟幾百萬裝修愛巢，近日又使多八十萬，購入潮爆環保電動房車，未來老婆李亞男過門前，先搞掂「二廠」。

拍劉曉慶做評判

要將無綫「四大處女」之一的李亞男私有化，王祖藍近年搏命𢱑銀儲老婆本，更在內地搞笑搞出財路，為湖南衞視節目《百變大咖秀》扮嘢扮到身價係咁升，由去年廿五萬人仔一集，升至三十五萬人仔起跳。

有價有市，據悉王祖藍稍後將會跟劉曉慶、吳孟達等，為遼寧衞視新節目《中國喜劇力量》擔任評判，坐定定都有錢落袋。

財來有方，王祖藍著手置家！去年八月以一千三百多萬購入大埔雅景花園獨立屋築愛巢後，生得矮揸慣車仔的他，近日再以八十萬購入香港仍未有貨、靠一部十七吋平板電腦控制全車開關及啟動的 Model S電動環保房車，方便長腳李亞男，將來唔使屈住坐！

據知祖藍願花八十萬購入的電動環保車，遇到壆位車身會自動升高，包唔會刮花。

環保車只靠一部十七吋的平板電腦來操控整輛車的啟動及開關，是全車的大腦。

由於車身沒需要安置死氣喉，開動引擎時只會發出輕微聲音，環保得很。

新屋自設叉電站

「呢款車喺美國好多人訂咗，祖藍三個月前上網落 order，香港有三百幾個訂單，佢排第二百個，架車應該兩個月後就可以到手。聽講祖藍喺新屋車房整埋一座叉電站，方便日日幫『二奶』叉足電去開工。」知情者說。

有新屋有新車，只差新娘就位！

原定六月迎娶李亞男的王祖藍，因為四月要為無綫開拍自編自演新劇《老表，你好 hea》並分身為內地節目《中國喜劇力量》做評判，緊接還有同女友孖咇拍攝環遊世界的愛情節目及拍住細細粒主持另一個玩嘢節目，加埋電影工作，已塞爆今年的期表，婚期唯有由六月押後至明年初。

對住李亞男五年幾都冇犯教規，王祖藍睇錢份上，再忍多半年，話咁易！

祖藍扮嘢扮出一片天，豬籠入水換車之餘又換樓，於大埔買入過千萬豪宅，為母親及未來老婆一起住而築的安樂窩。

平車追女

人仔細細的祖藍一向鍾情細車仔，五年前追李亞男時只駕一輛十幾萬貨仔的 Kia韓國車。

車仔代步

即使在無綫吃得開，祖藍早兩年都只是換了另一架二十多萬的大發仔代步。

G.E.M.

阿 G.E.M.憑唱功在內地爆紅，祖藍因扮她而分一杯羮人氣急升，賺人仔賺到笑。

掂咗

接 job接到手軟的王祖藍，剛出街的新劇《食為奴》其實是執二攤。原本班底是林峯加吳卓羲，配花旦陳法拉及陳敏之，兩生兩旦為節目巡禮拍曬預告，最後卻齊齊扭計唔接，搞到監製黃偉聲倒瀉籮蟹，要向《老表》合作過的祖藍求救。臨時拉伕上陣，主角面目全非兼次一等，穿崩、服飾打扮出現時代錯亂的膠位更加唔少，但首週播出最高收視有三十點，平均廿九點，可見王祖藍「當老行」。