掃呢頁CODE去手機

2014年3月6日 星期四

[壹週刊 1252] 三度人工受孕失敗 謝天華老婆:可能係天意! 謝天華,M1,




上週五謝天華同 Tina在又一村俱樂部食完午飯,齊齊到門外煲煙。

探熱針

三度人工受孕失敗 謝天華老婆:可能係天意!

去年離開無綫自立門戶的謝天華,同老婆 Tina(李天恩)轉眼結婚八年,據了解,一直恨有 B的 Tina,婚前檢查發現輸卵管閉塞,難以成孕,即使先後三次接受人工受孕,肚皮依然冇動靜。

上週五(二月二十八日)下午一時,謝天華開電單車載老婆到又一村撐枱腳,飯後二人孖咇在會所門外扯飯後煙,對於未能為老公繼後香燈, Tina坦言:「強求唔到,可能係天意!」

輸卵管閉塞

○五年 Tina(李天恩)終於成為謝太,老公謝天華來自大家庭,鍾意熱鬧又鍾意小朋友,特意進行婚前檢查,為生 B做準備。可惜報告顯示 Tina輸卵管閉塞,成孕機會好渺茫。

「謝天華知道老婆有呢個問題,其實冇乜太大反應,反而 Tina就好耿耿於懷,四圍打探有無方法解決。」 Tina身邊人說。

有份出席飯局的範振鋒,離開時孖住謝天華研究其落地不久的綿羊仔。

翻兜同友人吹水個多小時,臨離開前謝天華在阿叻的胞弟陳百燊陪同下再扯煙。

老公繼續留低吹水, Tina扯完煙後便獨自離開。

兩度失敗

婚後的謝天華事業轉入直路,更憑《學警狙擊》的「 Laughing哥」彈上一線,眼見不少名氣夫婦靠人工受孕生 B,恨有所出的 Tina對此十分積極。

據了解,一直抱觀望態度的謝天華雖然支持太太的決定,但當紮期工作排到密麻麻,身兼老公左右手的 Tina還要幫另一半打點公務,操勞加頻撲,兩度接受人工受孕均失敗。

「試咗兩次都唔 work, Tina好氣餒,撞啱嗰期天華做到冇停手,之後冇再聽 Tina提起要生 B。」 Tina身邊人說。

去年十一月謝天華同伊健、林曉峰等在紅館舉行一連四場的《歲月友情演唱會》。

去年同岑麗香拍罷《神槍狙擊》後,謝天華決定離開無綫,自立門戶。

去年七月,陳小春初為人父,小 Jasper得意可愛,間接引發 Tina三度嘗試人工受孕。

今年一月出席電影《男人唔可以窮》煞科宴,謝天華抱實小演員愛不釋手。

最後機會

直至去年,謝天華帶老婆探陳小春囝囝 Jasper,又再度刺激起 Tina生 B念頭,並於去年底第三度進行人工受孕。

「醫生同 Tina講,如果四次(人工受孕)都唔得,唔好再諗, Tina話自己都三十九歲,試埋今次唔 work都死心!」 Tina的密友透露。

去年離巢成立經理人公司「拉風工作室」的謝天華,上週五(二月二十八日)下午一時離開何文田住所,用電單車載太太 Tina前往又一村花園俱樂部,會合阿叻陳百祥等人食午飯。飯後兩公婆企出門口一齊扯煙,之後 Tina獨自離開,謝天華則留在俱樂部繼續吹水。

對於輸卵管閉塞一事, Tina說:「就算係都唔會周圍同人講。」至於生仔計劃, Tina坦言:「諗唔到呢個 picture,而家已經好感恩,有冇小朋友呢啲嘢順其自然,強求唔到,可能係天意!」

重要角色

女性的輸卵管位於盆骨腔內,左右各一,一端膨大呈喇叭狀,接受來自卵巢排出的卵細胞,另一端與子宮相通。在成孕的過程中,輸卵管擔任重要角色,讓男性的精子和女性的卵子結合成為胚胎,再遊走到子宮壁著床。至於導致輸卵管閉塞原因,大部分成因由盆腔炎和陰道發炎等炎症引起。

家庭醫生關嘉美表示,輸卵管閉塞可動手術處理,但生仔最簡單直接方法,還是接受人工受孕。「女性取卵子,男性取精子,響外面結合,將胚胎放回子宮,呢個方法仲穩健過做手術通輸卵管。」



鍾意就快D Share啦!