杏兒有新戀情？ 胡定欣封嘴：我唔可以拆穿
2014-03-04 17:09:00
胡定欣同胡杏兒日前去韓國旅行，今日定欣拍廣告時，話唔可以拆穿杏兒「戀情」喎，點解要搞到咁神秘嘅？
胡杏兒今日喺微博突然高調貼咗張溫馨攬仔照，仲留言話：「我找到了﹗」結果惹嚟各方揣測，杏兒係咪有新戀情，不過當事人杏兒未有回應，唔少粉絲都留言恭喜杏兒，同時亦有人問該男子係咪李思捷，亦有人話希望張相唔係劇照喎。
杏兒日前同胡定欣﹑黃智雯及胡蓓蔚去韓國旅行，定欣同毛舜筠今日為一個健康食品拍廣告，定欣直認張相出自佢手筆：「佢登咗出嚟？張相我影㗎，我唔拆穿佢住。」
咁呢位新歡係咪李思捷？定欣就笑住話唔知，咁李思捷有冇一齊去韓國旅行？佢只係話：「唔講，唔講，我唔講，唔可以拆穿，係一個小秘密。」咁係咪黃宗澤？定欣笑言：「你話呢？但我哋玩得好開心。」
咁杏兒男友係假嘅？佢繼續封嘴唔講，又再強調唔可以拆穿佢。定欣表示渴望杏兒盡快搵到佢Mr. Right，不過佢就話杏兒都唔係好急，所以大家唔使戥佢擔心。
講到杏兒新歡係咪李思捷？定欣笑笑口話「唔知」。（攝影：陳慧安）
胡定欣同毛舜筠今日為健康食品拍廣告。
呢張相今日喺網上瘋傳，究竟杏兒攬住嘅男子，係咪真命天子呢？（微博圖片）
|
鍾意就快D Share啦！
|
|
|
