掃呢頁CODE去手機

2014年4月17日 星期四

[壹週刊 1258] 電單車阻防煙門 謝安琪張繼聰遭投訴 謝安琪,張繼聰,M1,




探熱針

電單車阻防煙門 謝安琪張繼聰遭投訴

張繼聰愛車,作為常餐的謝安琪,投老公所好!今年一月,阿 Kay送 Benz A250做生日禮物,連同去年買入的黃色 Land Rover,兩架車,比華利山獨立屋寓所有兩個車位,啱啱夠用。不過張繼聰原來仲有架兩個轆,唔夠位,於是將電單車泊正停車場的防煙門外,由於防煙門是幾間屋共用,鄰居受阻,多次投訴,張繼聰仍然話之你!

置之不理

有高登女神謝安琪做老婆,張繼聰夫憑妻貴,豪住比華利山大屋,揸 Benz,活在福中。

除了愛玩四個轆,張繼聰還鍾意揸電單車。

「阿聰鍾意車,就算唔買,都好留意啲車款,有段時間佢更加迷上揸電單車,後來仲買埋,間中都會約朋友出去鍊番轉。阿 Kay覺得危險,唔係好贊成佢揸電單車,俾老婆話得多,阿聰先揸少咗。」謝安琪身邊人說。

大屋只得兩個車位,多咗架兩個轆,張繼聰方便自己,竟然將電單車泊正防煙門位置。

「防煙門係由停車場通往獨立屋地面,係幾間屋共用,佢間屋兩個位都泊曬車,張繼聰就夾硬將架電單車泊喺車位隔籬,正正塞住道防煙門。會用呢道門嘅鄰居已經投訴過佢,但佢完全唔理,搞到屋苑啲管理員都好難做。」知情者說。

張繼聰在停車位旁邊的防煙門前停放電單車(箭嘴),阻塞鄰居出入。

張氏夫婦原本各有各行,但一見記者,張繼聰立即行慢半步拖實老婆。

睇音樂劇前,張繼聰先出席代言廣告活動,見記者拍照,專登擰轉背唔願上鏡。

路數唔多

自從泊到無綫碼頭,張繼聰工作量倍增,可惜騷錢得六百,即使有份拍新劇《老表,你好 hea》,日日開工,收入依然有限,家庭擔子,始終要由謝安琪肩負。

「其實阿聰喺無綫算係多嘢做,可惜幫到知名度,但賺唔到錢,某程度同個人性格有關,太多牢騷,又唔夠圓滑,所以路數都唔多!成家人嘅開支都要靠阿 Kay,每個月開支都好大,呢兩年阿 Kay都要密密返內地唱騷賺錢。」

早前謝安琪有機會參與內地節目《中國音超》演出,但卻未能如 G.E.M.一樣,可以憑《我是歌手 2》爆紅,甚至被對方影響,流失不少接 job機會。

「以前內地有唔少商場騷同活動搵阿 Kay唱,佢做《中國音超》都係想提高知名度,希望接多啲騷搵多啲;但出嚟反應一般,加上呢輪阿 G.E.M.喺內地好火好搶手,係人都寧買當頭起,搞到阿 Kay搵少咗好多。」知情者說。

3月,謝安琪到台北開騷,演出時只騷玉腿。

身材不斷升 cup,令謝安琪做埋高登女神。

《老表,你好嘢!》收視理想,帶挈全體演員拍續集。

公園湊仔

上週五(四月十一日)上午十一時半,戴 cap帽孭黃色背囊的阿 Kay,駕著其紅色 Benz往馬鞍山一個公園。原來兒子張瞻與大班同學仔在公園玩,阿 Kay泊完車,自動自覺行去跟其他家長傾偈,又和小朋友影合照,張瞻則跳來跳去,阿 Kay捉都捉唔住。在公園 hea了近一小時,阿 Kay先送兒子返國際學校,自己才駕車回家。

同日晚上,阿 Kay與張繼聰拍拖到演藝學院睇音樂劇《 Q畸大道》,一見傳媒,張繼聰立即拖番住老婆,繼續曬!

張瞻衝埋去同女同學傾偈,阿 Kay跟住追仔好狼狽。

張瞻(箭嘴)忽然離隊喪跑。

阿 Kay與其他家長好好傾。

35歲張繼聰,近日狂操六嚿腹肌拍廣告。

二人行街 shopping,俾錢都係阿 Kay。

明知故犯

名人明星,或多或少比一般人較易得到優待,但方便被濫用,變成違規違法,時有所聞。

周啟生

早年住在西貢早禾坑村的周啟生,因嫌屋前有棵百年樹阻擋視野,有指他曾企圖用火水燒樹,事件驚動警方。

鄧紫棋( G.E.M.)

電視節目播出 G.E.M.香閨實況,有眼利網民發現她在開放式廚房用明火煮食爐,有觸犯《防火條例》之嫌, G.E.M.即以「用嚟裝飾」狡辯。

陳小春

06年,陳小春被指在其康樂園獨立屋僭建,在沒有正式申請的情況下,非法掘了一個大地牢作開 P之用,嚴重滋擾附近居民。

運氣差異

為打通中港財路,香港歌手爭住參加內地電視台音樂比賽節目,提升人氣。謝安琪早前殺入深圳衞視舉辦的《中國音超》,由全國八大唱片公司分隊制鬥唱,作為金牌大風隊隊長的阿 Kay,於第二輪複賽首次亮相,表現出色,獲全場最高分 9.91分,成為唯一代表香港進身決賽的女歌手,結果勇奪女子組銀獎,助她在內地人氣微升。

另一邊廂,鄧紫棋( G.E.M.)在湖南衞視舉辦的《我是歌手 2》中表現更加一鳴驚人,連續兩星期成為冠軍,亦是首位歌手成為四冠王,雖然在總決賽屈居第二名,但足夠讓她在全國爆紅。

同樣是內地比賽節目,但湖南衞視收視遠勝深圳衞視, G.E.M.的人氣亦遠遠拋離 Kay。邊個行緊運,好易睇!

憑《我是歌手 2》爆紅,阿 G.E.M.在微博衝破千萬粉絲。



鍾意就快D Share啦!