探熱針
冇斷過 李思捷生日 P 胡杏兒做主人家
上月，黃宗澤與楊崢的超級姊弟戀遭四方圍插；另一邊廂，前度胡杏兒唔執輸，發放攬李思捷親密照，並留言：「我找到了」。看似向舊愛公開贈興，但有指胡杏兒其實想為新戀情測試外界「水溫」。
結果彈多過讚！以為胡杏兒會斬纜，但日前李思捷四十歲生日開 P，胡杏兒以主人家身份在場外，更不時邀請男方到香閨玩煮飯仔，甚至幫李思捷新居搞傢俬。原來冇斷過，只係轉玩地下情。
宣示主權
以為「思兒戀」見光死，但上週五（四月十一日）晚，李思捷在杜老誌道的 Tunno大搞四十歲生日會，胡杏兒坐正外，曾經合作的藝人包括王祖藍、阮兆祥、鍾嘉欣、蕭正楠等，亦獲邀出席生日 P。
「嗰晚杏兒同胡蓓蔚一齊到，佢睇落同思捷班 friend好熟，一嚟到就打曬招呼，不過到影合照嗰陣，思捷同杏兒就好避忌，尤其係思捷，平時飲大兩杯見女就嘴，嗰晚杏兒喺度，佢反而好克制。最明顯係佢冇叫 Ellen（陳雅倫）去生日 P， Ellen每次見到佢就叫老公，思捷又會叫番佢做老婆；如果俾杏兒聽到，好難收科。嗰晚佢兩個黐頭芒咁，杏兒係主人家身份好明顯。」在場人士說。
三年前，二人在電視劇《換樂無窮》中扮夫妻，當時有正印女友春卷的李思捷，對胡杏兒照樣嗒糖，經常以女神稱呼對方。
「佢成日喺人面前讚杏兒好索，最衰係兄弟（黃宗澤）條女，如果唔係實溝佢，嗰排佢不知幾投入，當正杏兒係老婆一樣。」劇組工作人員
透露。
玩煮飯仔
到前年胡杏兒跟黃宗澤分手回復單身，李思捷即採取行動，頻密電話攻勢外，又借開電影搵女主角做話題，跟胡杏兒愈來愈多接觸。近數月，李思捷已經可以登堂入室，上胡杏兒屋企玩煮飯仔。
「思捷成日上杏兒屋企飲紅酒食住家飯，最初成班人，而家得番佢兩個。思捷早排搬屋，佢屋企嘅座地燈、 coffee table同兩張 designer chair，都係杏兒幫佢喺網上訂返嚟，思捷話鍾意杏兒屋企嘅布置，要訂埋同款傢俬，講到尾，都係冧女招。
「聽講杏兒屋企人對思捷印象都唔錯，話佢大學畢業又有啲家底。差在思捷形象唔好，『我找到了』單嘢俾網民狂插，原本杏兒想斬纜，好在思捷掹得番。」李思捷身邊人說。
嘴素顏女
對胡杏兒有心，但「雜食」難改的李思捷，搞生日 P前一晚，繼續上演街頭啜女真人騷。
上週四（十日）晚八點，李思捷坐七人車由何文田新居出發，與屋企人到佐敦食火鍋，之後會合夜蒲鐵腳喬寶寶及素顏女飲番兩杯。搭正十二點，食完生日蛋糕，已經飲到面紅紅的李思捷跟素顏女轉場到附近大廈頂樓繼續劈。
淩晨兩點，醉到企唔穩的壽星由素顏女扶住離開，二人更在街頭又攬又錫，女方更當街幫李思捷搓肚，毫不避忌。
女人湯丸
食女形象鮮明的李思捷，雖然經常一腳踏幾船，但天生有女性緣，與所有分手女友，都做到好朋友。
春卷
春卷王寶寶跟李思捷拍拖四年，照足對方意願放棄幕前工作，逆來順受，直至無法再忍受男友偷食，才放棄分手。分手後，李思捷依然相約春卷去 ball，李思捷執導微電影，春卷去探班，又幫手谷宣傳， friend爆！
|
鍾意就快D Share啦！
|
|
|
