2014年7月25日 星期五

[忽然1周 991] 媽咪姐醒你隱世鑽石盤 MW,




我封盤,交俾你哋嘞!

(設計對白)

媽咪姐

媽咪姐醒你隱世鑽石盤

嫁個有錢人,不嬲都係唔少姊妹嘅畢生目標。哎,今年 36歲嘅千億王國揸 fit人、吳光正孻仔吳宗權( Douglas)啱啱俾人影到同索女友甜蜜拍拖,城中又少一個筍盤㖭。但唔緊要,你哋仲有媽咪姐!我已經為各位嚴選咗香港 4大隱世鑽石盤。嗱,講嘅「筍」唔係撞口撞面嘅何公子、林公子,佢哋個個未夠 30,全部係有待「開發」嘅極優質潛力股,真係望吓都心郁呀!








《蘋果日報》圖片

吳光正孻仔吳宗權真係筍盤中的筍盤,除咗有米,仲曾經代表香港出戰多哈亞運會嘅水球項目,可惜,俾呢位索女 hold咗!

霍啟文 霍家隱士

背景:

26歲嘅霍啟文係霍英東集團行政總裁霍震寰嘅孻仔,自細去英國讀書,近年跟住老竇學做生意。除咗 09年同何家三房千金何超雲傳過吓緋聞,之後都甚少見報,堪稱「豪門隱形人」。

賣點:

以富二代嚟講,性格內向文靜,從表面證供睇,唔係花弗類。不過重點係,霍家坐擁超過 300億資產,而且佢唯一嘅大佬霍啟中喺 04年惹過官非,外間盛傳啟文會係霍震寰接班人,噢!

鑽石指數:

★★★★

霍震寰近年多帶霍啟文出外應酬㗎。

沙宣道霍家大宅似是童話城堡!

鄧裕鏗 不羈貴族

背景:

27歲嘅鄧裕鏗係香港著名慈善家鄧肇堅爵士曾孫,阿爸同英國皇室勁 friend、係中國會及時裝品牌「上海灘」嘅創辦人鄧永鏘爵士。當年戴妃來港係搵佢爸爸接待㗎!鄧裕鏗自小接觸貴族,嗰股氣質真係一眼 feel得到。

賣點:

流住 blue blood,女伴境界都唔同啲,鄧裕鏗曾經同國際名模 Kate Moss拍拖,平時鍾意睇畫展,飲大兩杯亦可以玩到好癲。最正嘅係,佢睇落瘦,但一剝衫就鋼條身形盡現, OMG!係差在佢成日周遊列國,要見佢真係要有 luck!

鑽石指數:

★★★★★

鄧家有幾有 face? Kate Moss、偉仔同嘉玲嚟晒剪綵啫!

嘩,呢個 look,真係流口水囉。

莊家淦 豪門肌男

背景:

25歲嘅莊家淦係市值 80億嘅莊士集團主席莊紹綏孻仔,甚少出席社交場合。不過,並唔代表佢唔蒲,只係唔及跟傅明憲拍拖嘅大哥莊家彬,以及三哥莊家豐玩得咁高調啫!

賣點:

由於上面有兩個阿哥同家姐莊家蕙頂住,莊家淦實在生活優悠,平日最鍾意就係操吓肌。 Woo,睇佢嗰身「實的的」嘅肌肉,真係落咗唔少心機㗎!啱晒鍾意陽光男,又唔鍾意豪門束縛嘅你呀。

鑽石指數:

★★★

操肌後和索女出海,常識吧!

莊氏一家喺大宅歡聚,睇嚟關係融洽。莊家淦仲要係孻仔拉心肝,筍!

雷正揚 九巴少爺

背景:

21歲嘅雷正揚家底雄厚,阿爸係九巴家族後人雷禮權,阿媽係香港名門利孝和夫人個女利蘊珍,家族資產百億計。淨係睇佢喺山頂種植道嗰間 4千 5百呎大屋嘅劃時代豪裝,浮誇程度真係不得了!

賣點:

雷正揚父母都係玩得之人,不時扮鬼扮馬。雖然婆媳關係一向唔易處理,但嫁入雷家至少會有 fun!不過乖乖雷正揚依家喺英國讀緊大學,各位姊妹要俾啲心機等吓!

鑽石指數:

★★★

雷家淨係個偏廳都大過普通人一間屋啦。

利孝和夫人好錫雷正揚呢粒外孫。

雷正揚、雷正殷(右)兄妹喺英國同四太仔何猷君好 friend㗎,得閒會一齊去 party㖭。

仲有星二代!

你話一入豪門深似海,驚驚?唔使慌,仲有新一批星二代俾你揀!淨係嗰種半隻腳踏入娛樂圈嘅虛榮已經殺死人啦,呵呵!

趙雅芝孻仔 黃愷傑

27歲嘅黃愷傑係趙雅芝同第二任老公黃錦燊生嘅細仔,有「最帥星二代」之稱。佢喺美國讀大學,後尾去咗北京電影學院讀碩士,已經喺國內拍過短片、電影、電視劇等,靚媽趙雅芝都好支持佢入行㗎!隨時 ready同香港觀眾見面。之但係……黃愷傑有個拍拖多年嘅 OL靚女友劉凱茵,各位姊妹望住先啦。

最帥

趙雅芝(左)會同阿仔一齊出席活動,親身支持㗎。

夏雨大仔 黃俊銘

25歲嘅黃俊銘喺加拿大讀傳理系,前年返香港去 now做娛樂新聞主播,不過嗰時都無乜人知佢係夏雨個仔。直至有賊入屋,佢奮勇抗賊,先上咗港聞版。黃俊銘唔算靚仔,但勝在係跆拳道黑帶三段,打得喎!連佢自己都話以前想入樂壇,但後尾知唔易,依家希望向動作片方向發展。啱啱就同老竇夏雨合作新戲《 ATM提款機》嘞!

最好打

黃俊銘不時會陪夏雨行街,幾乖仔。

圖片



鍾意就快D Share啦!
Related Posts Plugin for WordPress, Blogger...