阿 Rain和媽咪全力整理二手衫，貨物堆滿成間鋪。
探熱針
捱過一關 養起全家兩年 李彩華擴充救命鋪
十六歲出道，經歷過父親欠債、被公司雪藏解約的艱難期；李彩華的事業三年前終於憑內地劇《回家的誘惑》變天，如今已是個手持半億物業的小富婆。投資有道的她，近日更計劃將經營多年的二手衫店大肆擴充。
一集劇酬隨時勝過賣衫一個月收入，阿 Rain仍要辛苦經營二手衫鋪，純粹情意結。「○八年俾人雪，冇嘢做冇收入，呢段低潮期都係靠呢間鋪，賺到全家生活費；就算而家喺內地搵到錢，我都想繼續做落去。」阿 Rain說。
兩萬蚊開檔
拍罷內地劇《後媽的春天》後，李彩華返港小休，月中又要出發北上埋位拍新劇。留港半個月，阿 Rain把握時間，頻頻孖住 Rain媽，四出睇鋪。
「阿 Rain想擴充間二手衫鋪，而家間鋪得百幾呎，有貨都唔夠地方放，佢想搵啲四、五百呎鋪，揀樓上鋪定商場鋪仲未決定，要睇埋人流再計 budget。」阿 Rain身邊人說。
○八年，阿 Rain被寰宇雪藏，為免手停口停，膽粗粗的阿 Rain在銅鑼灣銅鑼坊租了個百多呎鋪位，按金上期連同草草執吓鋪面，花近兩萬元開檔賣二手衫，因為冇錢請人，由 Rain媽看鋪。
「 Rain媽好叻講嘢，儲落唔少熟客之餘亦不停有新客，高峰期每個月賺到七、八萬元，全家生活費都係靠呢間鋪。」
上週四（七月十日），阿 Rain母女與友人到白沙道睇鋪，等地產經紀期間，三人不時望向樓上一個單位，又留意附近人流環境。
留住救命鋪
睇完鋪，會合另一人後，再攞住三個大袋返回銅鑼坊的二手衫鋪。兩母女夾手夾腳執貨，衫鞋袋飾物慢慢襯，記者上前問阿 Rain有關擴充二手衫店計劃，她亦認有其事。
「而家都係揀緊鋪，過幾日要返大陸兩個月拍劇，所以都係交俾阿媽搞。」阿 Rain說。
已在內地企穩陣腳的阿 Rain，拍劇價已升至三十萬人仔一集，拍一個劇已經夠買一層樓，但她依然堅持經營二手衫鋪。
「我做呢一行，真係好多衫都只係著一兩次就唔再著，好浪費！賣二手衫除咗環保啲，其實都有啲情意結！嗰時（○八年）我俾人雪，無晒收入，好彩開咗呢間鋪，搵到一家人生活費，雖然而家係搵到錢，但都想 keep住間鋪。」阿 Rain說。
做好事有好報
至於一直負責看鋪的 Rain媽，亦對這間由自己一手打理的二手衫鋪充滿感情。
「做人好得意！可能無咗啲嘢，個天又會俾其他嘢你。都係有呢間鋪，先搵到餐飯食。講真，我年紀大，唔好聽講句，就算倒垃圾人哋都唔請。嗰時我每日都係十二點幾先開鋪，做到夜晚八點，有時都幾攰，但啲人借鎖匙去廁所，返嚟又幫襯我，做到幾千元生意，我又會好開心。
「其實呢個場好靜，但我哋鋪頭生意就好好。個女而家搵到食，所以我一直將大部分收入捐去紅十字會同無國界醫生，做多啲善事，好嘢就自然會嚟。」 Rain媽說。
零收入兩年
16歲出道的李彩華， 00年為代父還債，簽約黃栢高旗下的金牌娛樂； 04年，由前男友蕭定一的協助下，轉投寰宇，前林小明太太趙雪英對她照顧有加； 08年，林小明與趙雪英離婚， Rain的工作量隨即大減，繼而被公司雪藏，兩年近乎零收入。
10年， Rain得趙雪英之助，賠償百萬提早與寰宇解約。自此，開始北上發展，接下多套電視劇，並憑內地劇《回家的誘惑》成為收視演員，身價幾級跳，成功捱過了艱難期。
小富婆
轉戰國內拍劇多年的李彩華，將人仔換磚頭，目前手持四個物業，市值共超過 4,000萬，是圈中小富婆。
|
鍾意就快D Share啦！
|
|
|
